Фаластин Яқин Шарқ квартети (Россия, АҚШ, Евроиттифоқ, БМТ) аъзоси бўлган Қўшма Штатларни энди Фаластин — Исроил келишуви бўйича музокарачи сифатида кўрмайди. Бу ҳақда Фаластиннинг Москвадаги элчиси Ҳафиз Ноуфал маълум қилди, деб хабар беради «ТАСС».
«Биз АҚШни тинчлик музокаралари бўйича шерик сифатида кўрмаяпмиз. Қўшма Штатлар очиқдан-очиқ Исроил томонга ўтган экан, энди уни Яқин Шарқдаги вазият бўйича ҳамкор ҳисобламаймиз. Биз қабул қиладиган музокарачилар тариқасида Россия, Евроиттифоқ, Хитой ва бошқа давлатлар бор», — деди элчи.
АҚШ президенти Дональд Трамп Қуддусни Исроил пойтахти деб тан олганидан сўнг фаластинликлар ва Исроил ҳарбийлари ўртасида тўқнашувлар юз берган, бунинг оқибатида юздан ортиқ фаластинлик жабрланган эди. Бошқа мусулмон ўлкаларида ҳам АҚШнинг Қуддус бўйича қарорига қарши намойишлар бошланди.
Изоҳ (0)