Америкалик рэпер Дидди 2017 йилда энг кўп даромад топган қўшиқчига айланди

Дидди номи билан танилган америкалик рэпер Шон Комбс Forbes журнали версияси бўйича 2017 йилда дунёнинг энг кўп ҳақ тўланадиган қўшиқчилари рейтингини бошқарди. Бу ҳақда «РИА Новости» хабар бермоқда.

Хонанда 2017 йилда 130 миллион доллар ишлаб топди. Бундан 70 миллион доллари Sean John компанияси акцияларининг бир қисмини сотиш орқали қўлга киритилди.

Рейтингнинг иккинчи қаторини америкалик хонанда Бейонсе эгаллади (105 миллион доллар). Ушбу суммани асосан Lemonade альбомини қўллаб-қувватлаш доирасида ўтказилган концерт сафарлари келтирди.

Йилнинг энг кўп даромад қилган қўшиқчилари учлигини канадалик рэпер Дрейк якунлаб берди. 2017 йилда у, жумладан, Views альбоми билан боғлиқ концерт тури туфайли 92 миллион долларга эга бўлди.

Рейтинг ўнлигига, шунингдек, The Weeknd (92 миллион доллар), Coldplay (88 миллион доллар), Guns N' Roseс (84 миллион), Жастин Бибер (83,5 миллион), Брюс Спрингстин (75 миллион), Адель (69 миллион) ва Metallica (66,5 миллион) кирди.