Таиланд аҳолиси эзгу ишлар билан марҳум қирол Рама IX нинг туғилган кунини нишонламоқда

Таиланд аҳолиси бугун, 5 декабрь куни марҳум қирол Пумипон Адульядетнинг (Рама IX ) туғилган кунини нишонлайди, деб хабар беради «ТАСС».

Бу кун қиролнинг ўлимидан кейин ҳам қиролликдаги асосий байрамлардан бири бўлиб қолмоқда.

Бу йил мазкур байрам қирол ўлими ва бир йил давом этган миллий мотамдан сўнг илк марта нишонланмоқда. Монарх ҳаёт бўлганида 90 ёшни қаршилаган бўлар эди.

Рама IX нинг туғилган куни Таиланд учун 1958 йилдан бери миллий байрам ҳисобланади. 1980 йилнинг 5 декабридан бу кун яна «Ота куни» сифатида нишонланади. Аксарият таиландликлар марҳум қиролни «Миллат отаси — қироллар қироли» деб атайди.

Мамлакатда 5 декабрь дам олиш куни ҳисобланади. Бу кунда ҳар бир таиландлик монарх шарафига эзгу иш қилиши керак. Масалан, қиролликнинг аксарият аҳолиси қон қуйиш станцияларига бориб, донор сифатида қон топширади. Айримлар кўнгилли сифатида мамлакат ҳудудидаги пляж ва боғларни тозалайди.

Рама IX 2016 йилнинг 13 октябрида узоқ давом этган касалликдан сўнг 88 ёшда вафот этди.