Грузия давлат хавфсизлик хизмати раҳбари Вахтанг Гомелаури 22 ноябрь куни Тбилисидаги махсус операциялар чоғида йўқ қилинган террорчилар гуруҳи республика давлат чегарасини ноқонуний тарзда «яшил ҳудуд» орқали кесиб ўтганини маълум қилди, деб ёзади «Интерфакс».
Шунингдек, ҳуқуқ-тартибот органлари жиноятчилар қўллагани гумон қилинаётган қуроллар сақланадиган махфий омборнинг жойлашган жойини аниқлаган.
Шу билан бирга, Гомелаури чегаранинг айнан қайси қисмини кесиб ўтишганини айтишга тайёр эмаслигини, чунки бу тергов манфаатларига зид эканлигини таъкидлади. Айни вақтда грузиялик мутахассисларга текширувда АҚШнинг федерал қидирув бюроси ходимлари ёрдам бермоқда.
Тбилисида 21—22 ноябрь кунлари 20 соат давом этган махсус операция чоғида уч террорчи йўқ қилинган, бир нафари қўлга олинган эди. Йўқ қилинганлар орасида 2016 йилда Истанбул аэропортидаги терактни ташкиллаштиришда айбланган Аҳмед Чатаев ҳам бўлган. Тўқнашувда махсус топшириқли бўлинма жангчиларининг бир нафари ҳалок бўлди, уч нафари яраланди.
Изоҳ (0)