PROlogue – 2017 да давлат маблағи ҳисобидан суратга олинаётган фильмларнинг тақдири «тор доирада», «кабинетларда» ҳал бўлмаслиги таъкидланди

Ўзбекистон ёшлар иттифоқи, «Ўзбеккино» МА, Ёш киноижодкорлар кенгаши ҳамда Кинемотографияни ривожлантириш маркази томонидан ўтказилаётган III Республика PROlogue – 2017 кинофестивали давом этмоқда.

29 ноябрь куни ёш кино ижодкорларнинг кино лойиҳалари питчинг асосида соҳа мутахасислари, киношунослар, режиссёрлар ҳамда ОАВ ходимлари иштирокида кўриб чиқилди. Питчингда «Дарё» журналисти Феруз Муҳаммад ҳам иштирок этди.

Питчинг деб ёш ижодкорларнинг кино лойиҳаларини ҳомийлар, ҳаммаслаклар топиш мақсадида ўтказиладиган тақдимотига айтилади. Питчингда Санжар Султонов «Жараён», Машраб Алиқулов «Манзил», Дониёр Арипов «Сукунат», Шерзод Мусаев «Ўгай», Бобур Қобилов «Маленький Ангел», Муҳаммад Юсупов «Оқ-қора спектакль», Иброҳим Ҳамраев «Тумор» деб номланган лойиҳалари билан иштирок этди.

Ўзбек кино оламида илк марта амалга оширилаётган лойиҳада иштирокчилар ўн дақиқа давомида фильми ҳақида, унинг сценарийсидан тортиб то фильм учун қанча маблағ кетиши, актёрлар жамоаси, суратга олиш муддати, техникасигача маълумот бериши лозим бўлади. Питчингда Муҳаммад Юсуповнинг «Оқ-қора спектакл» деб номланган, жами 11 миллион 600 минг сўм маблағ ҳисобига суратга олиниши режалаштирилган лойиҳаси йиғилганлар орасида катта қизиқишга сабаб бўлди.

Муваффақиятли ўтган лойиҳа «Ўзбеккино» томонидан молиялаштирилиши алоҳида қайд этилди.

Питчингни бошқараётган журналист Шоира Рауфбоева Ёш киноижодкорлар кенгаши номидан «Биз питчинг сўзи нафақат тил бойлигимизда янги атама бўлиб қўшилишининг, балки ўзбек кино санъатида ҳам кенг қўлланиши таклифини бермоқчимиз. Токи, давлат маблағи ҳисобидан суратга олинаётган фильмларнинг тақдири тор доирада, кабинетларда ҳал бўлмаслиги керак деган фикрдамиз. Биз шаффофлик тарафдоримиз», дея фикрларини баён қилди.

Мазкур фикрларда жавобан «Ўзбеккино» директорининг биринчи ўринбосари Шуҳрат Ризаев қуйидагиларни билдириб ўтди:

Бугунги еттита тақдимот мени жуда ҳам қувонтирди. Биз катта кинодаги бадиий кенгашнинг ишини айнан шундай ташкил қилганмиз. Бизнинг янги низомимиз тўлиғича кино лойиҳаларининг тақдимотига қаратилади. Кинолойиҳалар бу ҳамфикр ижодкорларнинг биргаликда тайёрлаган кино лойиҳаси ва унинг тақдимотидир. Сизлар ҳозир якка ҳолда тайёрлаган лойиҳани тақдим қилмоқдасизлар. Биз бир нечта ижодкорларнинг биргаликда, бирлашиб, фикрлашгандан сўнг бадиий кенгашга тақдим этиши нуқтаи назаридан низом ишлаб чиққанмиз. Бугун сизлар бизнинг шу йўналишда бошлаган ҳаракатларимизни билиб-билмай, ўзингизнинг доирангизда амалга оширишга ҳаракат қилдинглар ва бу таҳсинга сазовор иш бўлди.

Шуҳрат Ризаев, «Ўзбеккино» директорининг биринчи ўринбосари