Ўзбекистон ёшлар иттифоқи, «Ўзбеккино» МА, Ёш киноижодкорлар кенгаши ҳамда Кинемотографияни ривожлантириш маркази томонидан ўтказилаётган III Республика PROLogue – 2017 кинофестивалининг очилиш маросими давом этмоқда, маълум қилди «Дарё»га Ёш киноижодкорлар кенгашининг матбуот хизмати.
Ёшлар ижод саройида санъат аҳлининг буюк афсоналаридан тортиб ёш умидли режиссёр ва актёрлар бир даврага жам бўлди.
Фестиваль лойиҳаси доирасида санъат соҳасида босиб ўтган йўли билан ҳақиқий афсонага айланган санъат дарғаларга бағишланган «Орамиздаги афсоналар» номли фотокўргазманинг очилиши бўлиб ўтди.
Кўргазмада 30 дан ортиқ машҳур киноижодкорлар: Али Ҳамраев, Шуҳрат Аббосов, Зулфиқор Мусоқов, Рихси Иброҳимова каби тирик афсоналарнинг суратлари ўрин олган.
Кўргазма ғояси муаллифи Мухлиса Азизова, фотограф — Ғайрат Мўминов.
«Орамиздаги афсоналар» — бу ёшларнинг устозларга бўлган ҳурмати сифатида ташкил этилган кўргазма. Айтишимиз мумкинки, устоз санъаткорлар ёш киноижодкорлар учун ўзининг беқиёс ижод мактабини яратган. Уларда биз — киноижодкорлар ўрганиши керак бўлган жуда кўп ижод сирлари мавжуд. Ушбу кўргазмани ташкил этишдан кўзланган мақсад ҳам устозларни қўллаб-қувватлаш, улар доимо эътибор марказида эканликларини эслатишдир.Мухлиса Азизова, режиссёр, кўргазма муаллифи
PROLogue – 2017 кинофестивали доирасида ташкил қилинган лойиҳалар давом этмоқда.
Изоҳ (0)