Наманганда Республика ихтисослаштирилган эндокринология илмий-амалий тиббиёт маркази ва вилоят соғлиқни сақлаш бошқармаси ҳамкорлигида ташкил этилган «Фарғона водийсида гастроэнтерология ҳафталиги-2017» номли биринчи минтақавий илмий-амалий конференция бошланди. Бу ҳақда «Дарё»га бошқарма матбуот хизмати маълум қилди.
Анжуман «Жигар ва ошқозон ости бези хавфли ҳамда хавфли бўлмаган ўсмаларини аниқлаш ва жарроҳлик йўли билан даволашнинг долзарб масалалари» мавзусига бағишланган. Унга Андижон, Фарғона ва Наманган вилоятлари соғлиқни сақлаш муассасаларида фаолият олиб бораётган жарроҳлар таклиф этилди. Анжуманни Республика ихтисослаштирилган эндокринология илмий-амалий тиббиёт маркази директори, профессор Анвар Алимов очиб берди. Вилоят соғлиқни сақлаш бошқармаси бошлиғи Солижон Мўминов меҳмонларни қутлади.
Конференциянинг биринчи куни гепатопанкреатобилар жарроҳликнинг долзарб масалаларига оид илмий маърузалар тингланди. Россиядаги Вишневский номли жарроҳлик институти профессорлари Илья Козлов ва Димитрий Ионкин, академик В.Воҳидов номидаги республика ихтисослаштирилган жарроҳлик маркази катта илмий ходими Мақсуджон Нишоновнинг маърузалари тингланди.
Анжуманнинг амалий қисми Республика шошилинч тиббий ёрдам илмий маркази Наманган филиалида давом эттирилади. 3 кун мобайнида россиялик таниқли шифокор олимлар Тошкент шаҳридан келган ҳамкасблари билан биргаликда маҳаллий жарроҳларга энг мураккаб амалиётларни кўрсатади.
Изоҳ (0)