Жорий йилнинг 27 ноябрь куни Тошкент шаҳридаги International Hotel Tashkent меҳмонхонасининг катта анжуманлар залида UNESCO томонидан эътироф этилган 10 ноябрь – «Халқаро фан куни» муносабати билан Ўзбекистон фанининг ривожланишига, унинг дунё миқёсида обрўси ортишига муносиб ҳисса қўшаётган фаол олимларни рағбатлантириш мақсадида тақдирлаш тадбири ўтказилди. Бу ҳақда Ўзбекистон Республикаси Фан ва Технологиялар агентлиги «Дарё»га хабар берди.
Ушбу тадбир Ўзбекистон Республикаси Фан ва технологиялар агентлиги ҳамда Clarivate Analytics компанияси (АҚШ) билан биргаликда ташкил қилинди. Номинация ғолиблари Республикадаги олий таълим ва илмий муассасаларда фаолият юритаётган олимлар ҳисобланиб, уларнинг илмий ишлари самарадорлиги халқаро Web of Science илмий-таҳлилий электрон маълумотлар базасига кирган импакт-факторли илмий нашрларда чоп этилган илмий мақолалар ва уларга келтирилган ҳаволалар асосида баҳоланди.
Тадбирда Ҳукумат вакиллари, вазирликлар ва идоралар раҳбарлари, олий ўқув юртлари ва илмий тадқиқот муассасалари раҳбарлари, илмий ходимлар, ўқитувчи-профессорлар, ёш олимлар, оммавий ахборот воситалари ходимлари иштирок этди (жами 300 нафардан зиёд).
Тошкент шаҳридаги Турин политехника университети кафедра мудири, техника фанлари доктори Туляганов Дилшат Убайдуллаевич, Ўзбекистон Республикаси Фанлар академияси Астрономия институти бўлим мудири, физика-математика фанлари доктори, профессор Аҳмедов Бобомурат Жураевич, Фанлар академияси Математика институти етакчи илмий ходими, физика-математика фанлари доктори, профессор Омиров Бахром Абдазович, Фанлар академияси Ўсимлик моддалар кимёси институти лаборатория мудири, кимё фанлари доктори, профессор Ташходжаев Баходир, Тошкент шаҳридаги Халқаро Вестминстер университети катта ўқитувчиси Салаходжаев Рауфхон Фарходхонович ва бошқалар Вазирлар Маҳкамасининг Фахрий ёрлиғи ва пул мукофоти, шунингдек, Фан ва технологиялар агентлиги ҳамда Clarivate Analytics компаниясининг Фахрий ёрлиғи, қимматбаҳо ва эсдалик совғалари билан тақдирланди.
Бундан ташқари ташкилотчилар томонидан қуйидаги номинациялар бўйича ғолиблар мукофотланди:
«Энг яхши аёл тадқиқотчи» номинацияси ғолиби – Республика Терапия ва тиббий реабилитация маркази директор ўринбосари, тиббиёт фанлари доктори Камилова Умида Кабировна; «Энг яхши ёш олим» номинацияси ғолиби – Ўзбекистон Республикаси Фанлар академияси Астрономия институти етакчи илмий ходими, физика-математика фанлари доктори Абдужаббаров Ахмаджон Адилжанович; «Энг яхши илмий муассаса» номинацияси ғолиби – Ўзбекистон Республикаси Фанлар академияси Ядро физикаси институти директори, академик Юлдашев Бекзод Содиқович; «Энг яхши олий ўқув юрти» номинацияси ғолиби – Ўзбекистон миллий университети ректори Марахимов Аваз Рахимович ва бошқалар.
Изоҳ (0)