Ўзбекистон Ички ишлар вазирлиги (ИИВ) Йўл ҳаракати хавфсизлиги бош бошқармаси (ЙҲХББ) мамлакат йўлларидаги ўлим ҳолатлари ҳақида ахборот сўраган нашрга хат билан мурожаат қилишни тавсия қилди.
Аввалроқ «Газета.uz» интернет-нашри мамлакат йўлларидаги ЙТҲларнинг ҳафталик расмий статистикаси ваколатли органлар томонидан ўлим ҳолатлари кўрсатилмай эълон қилинаётганига эътибор қаратгани ҳақида ёзилган эди.
Мавзуга доир: «Ўлим ҳолатларига доир статисикани яшириш Ўзбекистон йўлларидаги вазиятни яхшилашга хизмат қилмайди»
Қайд этиш жоиз, бу борада ваколатли ҳисобланган ИИВ ЙҲХББ аварияларнинг ҳафталик статистикасини Президент Шавкат Мирзиёев иштирокида 15 ноябрь куни бўлиб ўтган видеоселектордан сўнг эълон қилишни бошлади.
Ўша йиғилишда 2017 йилнинг январь—октябрь ойларида Ўзбекистонда 8000 га яқин ЙТҲ юз бергани, оқибатда 2031 киши ҳалок бўлиб (кунига тахминан 6 кишидан кўпроқ), 7622 киши тан жароҳати олгани маълум қилинган эди.
Видеоселектор йиғилиши давомида Президент ҳуқуқни муҳофаза қилиш идоралари матбуот хизматларининг фаолиятини танқид қилиб, улар «умуман талабга жавоб бермаслиги»ни қайд этиб ўтган эди.
Маълумот ўрнида, 30 октябрь куни Ўзбекистон ҳукумати ИИВ матбуот хизмати фаолиятини ташкил этиш тўғрисидаги қарорни қабул қилган эди. Унда, жумладан, ИИВ матбуот хизмати тизимида Жамоатчилик ва оммавий ахборот воситалари билан алоқалар бошқармасини тузиш ҳақида кўрсатма берилган ва янги бошқармага аҳолига ўз вақтида ва ишончли ахборот етказиш вазифаси юклатилган эди.
Изоҳ (0)