Ўзбекистон Президенти Шавкат Мирзиёев 15 ноябрь куни бўлган видеоселектор йиғилишида Боровский номидаги Тошкент тиббиёт коллежида юз берган шов-шувли воқеаларга ҳам муносабат билдирган эди.
Президент бу воқеа тафсилотлари интернетда кенг тарқалиб кетганидан кейингина ҳуқуқ-тартибот идоралари унга эътибор қаратганига танқидий муносабат билдирди. Шунингдек, бу органларнинг матбуот хизматлари фаолияти «талабга жавоб бермаслиги»ни таъкидлади.
Нега Боровский коллежида юз берган ҳодиса бўйича жамоатчиликни зудлик билан кенг хабардор қилиш чоралари кўрилмаган? Нега деганда, эскича фикрлаш оқибатида масъул раҳбарлар бефарқликка йўл қўйиб, вазиятни олдиндан кўра билмаган. Нимага биз интернетда шов-шув бўлганидан кейин бу воқеа ҳақида билдик?Боровский коллежи ўқувчиси, 17 ёшли Жасурбек Иброҳимов 1 июнь куни касалхонада вафот этган эди. У 3 май куни коллеждошлари томонидан калтаклангани, шундан сўнг касалхонага тушгани айтилган эди. Жамоатчилик бу воқеа ҳақида Иброҳимовнинг онаси томонидан Ўзбекистон Президентига йўлланган мурожаат ижтимоий тармоқларда эълон қилингач, июнь ойи бошида хабар топди. Она ўз мурожаатида фарзанди калтакланганидан сўнг тўрт бор операция қилинганини ҳам таъкидлаган эди.Бугун оммавий ахборот воситаларида бу мавзуда берилаётган материаллар сифати, уларнинг таъсирчанлиги ҳамда ҳуқуқни муҳофаза қилувчи идоралар матбуот хизматларининг фаолияти умуман талабга жавоб бермайди.
Шавкат Мирзиёев, Ўзбекистон Президенти
Мазкур воқеа ижтимоий тармоқларда шов-шув келтириб чиқарди, жамоатчилик ҳодиса айбдорлари жазоланишини талаб қилди; бу ҳақдаги талабнома имзолаш учун одамлар «Дўстлик» боғига йиғилди. 4 июнь куни Миробод туман ИИБ томонидан жиноят иши очилди, гумонланувчи сифатида Исломбек Тўлаганов ҳибсга олинди. Иш Ўзбекистон бош прокурори Ихтиёр Абдуллаевнинг шахсий назоратига олингани айтилди. 6 июнь куни коллеж раҳбарияти ишдан олингани, кейинроқ эса коллеж умуман ёпилиши маълум бўлди.
Сентябрь бошида иш юзасидан тергов ҳаракатлари якунига етгани маълум бўлди. 26 сентябрдан бошлаб иш бўйича суд эшитувлари бошланди. 30 октябрь куни Жасурбек Иброҳимов иши бўйича суд ҳукми эълон қилинди — Исломбек Тўлаганов олти йилга озодликдан маҳрум этилди; у 3 май куни коллеждоши Жасурбек Иброҳимовни урганликда айбдор деб топилди. Суд ҳукми эълон қилинганидан кўп ўтмай, «Дўстлик» боғида одамлар учрашувини ташкиллаштирган фаоллардан бири маъмурий қамоқ билан жазолангани хабар қилинди.
Изоҳ (0)