Америкалик эркак ўзи «эски-туски» деб ҳисоблаган ёпинчиқни 1,5 млн долларга сотди ва фаровон ҳаётга эришди

АҚШнинг Калифорния штатида яшовчи Лорен Крайтцер ҳиндуларнинг навахо қабиласи томонидан 1840 йилларда тўқилган ёпинчиқни 1,5 миллион долларга сотди. Эркак бир неча йил давомида ёпинчиқни «кераксиз ва эски-туски нарса» деб ҳисоблаган. Бу ҳақда TJournal хабар берди.

2005 йилда Крайтцернинг бувиси вафот этганда, у бувиси томонидан ваъда қилинган китобларни олиб келиш учун унинг уйига борган. Бироқ у уйда ҳамма нарса бетартиб ётган эди: эркакнинг сўзларига кўра, ҳамма нарсани онаси ва синглиси ўзаро бўлиб олган эди.

Қоплардан бирида Крайтцер бувисининг онасидан қолган иккита ёпинчиқни топган. Эркакнинг синглиси дўкондан сотиб олинган ёпинчиқни олиб қўйган, иккинчиси Крайтцерда қолган.

Эркак бутун умр дурадгор бўлиб ишлаган. Бироқ 2007 йилда юз берган автоҳалокат оқибатида у чап оёғидан ажралган. Шундан сўнг у ишламаган ва ногиронлик нафақаси ҳисобига яшаган. Крайтцернинг нафақаси 900 доллар бўлиб, унинг 700 долларини уй ижараси учун тўлаган, 200 долларига эса яшаган.

Пул етишмовчилиги сабабли у ўз болаларини Луизианадаги қариндошлари қарамоғига топширган. Бу даврлар унинг учун жуда оғир бўлган.

Эркак бир неча йил давомида жавонда ётган ёпинчиқ ҳақида эсламаган. Бироқ 2011 йилда у оммабоп Antiques Roadshow телешоусини кўриб қолган. Шоуда баҳоловчи галереячи Дон Эллис аризоналик кекса эркакка ундаги навахолар қабиласидан қолган ёпинчиқ 500 минг доллар туриши мумкинлигини айтиб берган.

Шоуни томоша қилган Крайтцер ўзидаги ёпинчиқни телешоудаги билан таққослаб кўрган ва улар бир хил бўлган.

Қадимий буюмлар сотувчилари Крайтцернинг ёпинчиғига дастлаб ишончсизлик билан қараган. Бир қанча вақтдан сўнг John Moran аукционлар уйининг баҳоловчилари ёпинчиққа қизиқиб қолган. Мутахассис Жефф Моран ёпинчиқ учун 200 минг доллар тўланиши мумкинлигини айтган.

Савдо 2012 йилда бўлиб ўтган. У 77 сония давом этган ва Крайтцернинг ёпинчиғи 1,5 миллион долларга сотилган. Харидор галереячи Дон Эллис бўлган.

Солиқлар ҳисобига Крайтцер 1,3 миллион доллар олган. Савдодан тушган маблағни у шаҳар маъмурияти облигацияларига инвестиция қилган. Шунингдек, у иккита уй сотиб олган. Уларнинг бирида ҳозирда ўзи оиласи билан яшамоқда, иккинчисини эса ижарага берган.

Шу билан бирга, Крайтцер Dodge Challenger SRT8 автомобилини ва Harley-Davidson мотоциклини сотиб олган. Кейин эса рафиқаси ва уч нафар қизи билан Мексикага денгиз саёҳатига борган.

Галереячи Дон Эллис эса ёпинчиқни 2016 йилда 1,8 миллион долларга сотган.