Россиянинг Иркутск вилояти полицияси тайгадаги Усть-Илимск туманида юз берган воқеа юзасидан текширув ўтказмоқда. 57 ёшли овчининг сўзларига кўра, айиқ овчиларнинг қишки уйидан «Вепрь» ва «ИЖ» милтиқларини ўғирлаб кетган. Бу ҳақда «ТАСС» хабар берди.
Овчининг айтишича, у 16 ноябрь куни энг яқин қишлоқдан ўнлаб километр узоқликдаги ўрмонда айланиб юрган вақтда овчилар уйида тўхташга қарор қилган. Нарсаларни бошпанада қолдирган овчи сув олиб келиш учун кетган. Ортига қайтиб келганида эса шубҳали овозни эшитган ва уйда айиқнинг шарпасини кўрган. Ёввойи ҳайвонга дуч келмаслик учун эркак бир неча соат давомида ўрмонда яширинган. Бошпанага қайтиб келганида эса милтиқлар солинган халта йўқ бўлган.
Бир неча кун давомида овчи милтиқларни мустақил равишда излаган, бироқ бундан натижа чиқмаган. Тайгадан қайтгач, у полицияга мурожаат қилган. Полиция ходимлари воқеа жойига етиб бориб, уйни ва унинг атрофидаги ҳудудларни ўрганган. Ўрганиш давомида айиқнинг бу жойга келгани тасдиқланган, аммо кучли қор бўрони юз бергани сабабли унинг излари йўқолган.
Энди овчига нисбатан қуролни сақлаш қоидаларини бузиб, унинг йўқолишига сабаб бўлгани учун маъмурий иш қўзғатилган. Эркак жаримага тортилиши ёки бир йилгача қурол сотиб олиш, сақлаш ва олиб юриш ҳуқуқидан маҳрум этилиши мумкин.
Изоҳ (0)