AQShning Kaliforniya shtatida yashovchi Loren Krayttser hindularning navaxo qabilasi tomonidan 1840-yillarda to‘qilgan yopinchiqni 1,5 million dollarga sotdi. Erkak bir necha yil davomida yopinchiqni “keraksiz va eski-tuski narsa” deb hisoblagan. Bu haqda TJournal xabar berdi.
2005-yilda Krayttserning buvisi vafot etganda, u buvisi tomonidan va’da qilingan kitoblarni olib kelish uchun uning uyiga borgan. Biroq u uyda hamma narsa betartib yotgan edi: erkakning so‘zlariga ko‘ra, hamma narsani onasi va singlisi o‘zaro bo‘lib olgan edi.
Qoplardan birida Krayttser buvisining onasidan qolgan ikkita yopinchiqni topgan. Erkakning singlisi do‘kondan sotib olingan yopinchiqni olib qo‘ygan, ikkinchisi Krayttserda qolgan.
Erkak butun umr duradgor bo‘lib ishlagan. Biroq 2007-yilda yuz bergan avtohalokat oqibatida u chap oyog‘idan ajralgan. Shundan so‘ng u ishlamagan va nogironlik nafaqasi hisobiga yashagan. Krayttserning nafaqasi 900 dollar bo‘lib, uning 700 dollarini uy ijarasi uchun to‘lagan, 200 dollariga esa yashagan.
Pul yetishmovchiligi sababli u o‘z bolalarini Luizianadagi qarindoshlari qaramog‘iga topshirgan. Bu davrlar uning uchun juda og‘ir bo‘lgan.
Erkak bir necha yil davomida javonda yotgan yopinchiq haqida eslamagan. Biroq 2011-yilda u ommabop Antiques Roadshow teleshousini ko‘rib qolgan. Shouda baholovchi galereyachi Don Ellis arizonalik keksa erkakka undagi navaxolar qabilasidan qolgan yopinchiq 500 ming dollar turishi mumkinligini aytib bergan.
Shouni tomosha qilgan Krayttser o‘zidagi yopinchiqni teleshoudagi bilan taqqoslab ko‘rgan va ular bir xil bo‘lgan.
Qadimiy buyumlar sotuvchilari Krayttserning yopinchig‘iga dastlab ishonchsizlik bilan qaragan. Bir qancha vaqtdan so‘ng John Moran auksionlar uyining baholovchilari yopinchiqqa qiziqib qolgan. Mutaxassis Jeff Moran yopinchiq uchun 200 ming dollar to‘lanishi mumkinligini aytgan.
Savdo 2012-yilda bo‘lib o‘tgan. U 77 soniya davom etgan va Krayttserning yopinchig‘i 1,5 million dollarga sotilgan. Xaridor galereyachi Don Ellis bo‘lgan.
Soliqlar hisobiga Krayttser 1,3 million dollar olgan. Savdodan tushgan mablag‘ni u shahar ma’muriyati obligatsiyalariga investitsiya qilgan. Shuningdek, u ikkita uy sotib olgan. Ularning birida hozirda o‘zi oilasi bilan yashamoqda, ikkinchisini esa ijaraga bergan.
Shu bilan birga, Krayttser Dodge Challenger SRT8 avtomobilini va Harley-Davidson motosiklini sotib olgan. Keyin esa rafiqasi va uch nafar qizi bilan Meksikaga dengiz sayohatiga borgan.
Galereyachi Don Ellis esa yopinchiqni 2016-yilda 1,8 million dollarga sotgan.
Izoh (0)