Қорақалпоғистонда ўтказилган хатлов натижасида 114 та аввал хусусийлаштирилган ва бўш турган объектлар аниқланди

Қорақалпоғистон Республикасида ўтказилган хатлов натижасида 114 та аввал хусусийлаштирилган ва бўш турган объектлар аниқланди, деб хабар беради Давлат рақобат қўмитаси ахборот хизмати.

Бугунги кунда Қорақалпоғистон Республикасидаги бўш турган объектларнинг 53 таси негизида инвестиция лойиҳалари ишлаб чиқилган бўлиб, ушбу лойиҳалар бўш турган корхоналарни фаолияти тикланишига туртки бўлмоқда. Мазкур лойиҳаларни амалга ошириш доирасида 67,6 миллиард сўмлик инвестициялар ўзлаштирилиши ва 534 та янги иш ўринлари яратилиши кўзда тутилган.

Бугунги кунга қадар вилоятда 9 та корхона фаолияти қайта тикланиб, 34 та қўшимча ишчи ўринлари барпо этилди.

Жумладан, Нукус шаҳри Тўрткўл гузарида жойлашган «Нукус Реммаш» МЧЖга тегишли бино ва иншоотлар, «Диан Пласт» МЧЖга тегишли «Гоззал» хизмат кўрсатиш биноси, «Остен» МЧЖга тегишли универмаг биноси каби кўплаб замонавий хизмат кўрсатиш ва ишлаб чиқариш объектлари ишга тушди.

Хусусан, Нукус шаҳри Тўрткўл гузарида жойлашган «Нукус Реммаш» МЧЖга тегишли бино ва иншоатлар негизида 32 миллиард сўм миқдорида киритилган сармоя эвазига телевизор ишлаб чиқариш йўлга қўйилди. Бунда 100 та янги иш ўринлари яратилишига эришилди. Корхона йилига 150 минг дона телевизор ишлаб чиқариш қувватига эга.