Жанубий Корея Ўзбекистон болаларига беғараз асосда 2 мингта пианино тақдим этади

Ўзбекистон мактабгача таълим вазири Агриппина Шин Жанубий Кореяда қатор учрашув ва музокаралар ўтказди. Бу ҳақда «Газета.uz» хабар бермоқда.

Нашрга берган интервьюсида вазир мактабгача таълим тизимини замонавий асосга қуришни режалаштираётган Ўзбекистон учун Жанубий Кореянинг бу йўналишдаги тажрибаси муҳим бўлишини таъкидлаб ўтди.

«Мактабгача таълим вазирлиги — мутлақо янги идора, биз ишни нолдан бошладик, ва биз учун чет эл, шу жумладан, Жанубий Корея тажрибаси муҳим», — деди Агриппина Шин.

«Бу ерда биз боланинг эрта ривожланишининг барча аспектлари алоҳида эътибор ва назорат остидалигини кўрдик. Асосийси — муносабат, болага меҳр. Мактабгача таълим муассасаларида бола ривожланиши ва унинг хавфсизлиги учун ҳамма иш амалга оширилган. Айниқса инклюзив таълимга бўлган эътиборни қайд қилмоқчиман», — қўшимча қилди вазир.

Унинг таъкидлашича, икки томон ҳам Ўзбекистон Президенти Шавкат Мирзиёевнинг Жанубий Кореяга ташрифидан кўп нарса кутмоқда.

Бундан ташқари, Шин хонимнинг хабар беришича, болаларнинг ривожланиш шароитларини яхшилаш мақсадида 22 ноябрь куни Сеулда Ўзбекистонга 2 мингта пианино беғараз асосда топширилиши борасида келишув имзоланиши кутилмоқда.