Butunjahon sog‘liqni saqlash tashkiloti antibiotiklardan foydalanishda mutaxassislar bilan maslahatlashish tavsiya qildi

13—19-noyabr kunlari Butundunyo antibiotiklardan to‘g‘ri foydalanish haftaligi bo‘lib o‘tdi. Bu haqda “Gazeta.uz” xabar bermoqda.

Joriy yilgi haftalikka “Antibiotiklarni qabul qilib olishdan oldin malakali mutaxassislar bilan maslahatlashing” degan shior mavzu sifatida tanlab olindi.

Butun dunyoda antibiotiklarga bardoshlilik tahdid soladigan darajada oshib bormoqda. Ularning samaradorligi kamaygani sari davolash qiyin, ba’zan esa imkonsiz bo‘lgan infeksiyalar, jumladan, pnevmoniya, sil, qon zaharlanishi, gonoreya, oziq-ovqat iste’moli bilan bog‘liq kasalliklar soni ortib bormoqda.

Antibiotiklarga bardoshlilik ulardan noto‘g‘ri va o‘ta ko‘p foydalanish, shuningdek, infeksiyalarga qarshi kurash va ularning profilaktikasi  zaifligi sababli kuchaydi. Butunjahon sog‘liqni saqlash tashkiloti buning oldini olish uchun quyidagilarni tavsiya qiladi:

Antibiotiklarni faqat malakali tibbiyot xodimi ko‘rsatmasi bilan qabul qilish;

Tibbiyot xodimi bunga hojat yo‘qligini bildirgan taqdirda antibiotiklarni talab qilmaslik;

Antibiotiklarni qabul qilish chog‘ida shifokor tavsiyalariga amal qilish;

O‘z antibiotiklarini hech qachon boshqa shaxslarga bermaslik va qolgan antibiotiklardan foydalanmaslik;

Xavfsiz taomlanish va gigiyena tamoyillariga amal qilish, o‘z vaqtida emlanish.