Россиядаги тўртта бизнес уюшманинг раҳбарлари мамлакат президенти Владимир Путинга бош вазир Дмитрий Медведевнинг ҳаракатлари устидан шикоят йўллади. Шикоятда таъкидланишича, ҳукумат томонидан уч йиллик бюджет лойиҳасига киритилган янги тўловлар сабабли тадбиркорлар 2018 йилнинг ўзидаёқ қўшимча 100 миллиард рубль (1,677 миллиард доллар атрофида) тўлашлари керак бўлмоқда, деб хабар берди «MK.ru».
Путинга мурожаатни Россия Саноатчилар ва тадбиркорлар уюшмаси, «Ишбилармон Россия», Савдо-саноат палатаси ҳамда «Россия таянчи» уюшмаларининг президентлари мактуб орқали йўллаган.
Тадбиркорларнинг ҳужжатда кўрсатишларича, мавжуд фиксал юкламани ўзгартирмаслик борасидаги битимнинг мавжудлигига қарамай (унинг ўсиши борасидаги мораторийси 2018 йил охиригача амалда эди), келгуси йилнинг ўзидаёқ бизнеслар ҳар хил тўловлар шаклида қўшимча 100 миллиард рублдан ортиқ маблағ тўлаши керак.
Масалан, яқин уч йиллик бюджет лойиҳасига бир вақтнинг ўзида расмий солиқ мақомига эга бўлмаган учта тўлов киритилмоқда. Гап станоклар ва ускуналар импорти, оғир ва энергетика ишлаб чиқариш воситалари учун 7 фоизли товон пули, денгиз портларида 25 фоиз сармоя йиғиш ҳақида кетмоқда.
Бизнесменлар президентни ушбу юкламалар инвестицияларнинг муқаррар қисқаришига, ишлаб чиқариш воситалари ва деярли барча соҳалардаги якуний маҳсулот нархнинг кўтарилишига олиб келиши ҳақида огоҳлантирди.
Изоҳ (0)