Қирғизистоннинг «Де Факто» газетаси бош муҳаррири Амантур Мусагулов мамлакат президенти Алмазбек Атамбаевнинг олти йиллик бошқаруви натижаларига бағишланган матбуот анжуманида унинг соатини сўраб олди, деб хабар берди «РИА Новости».
Савол бериш мақсадида микрофонга яқинлашган Мусагулов тушида президентнинг соатини совға сифатида олганини сўзлаб, мамлакат раҳбаридан «эслаб юриш» учун соатини ўзига совға қилишини сўради.
«Яхшиям шимимни сўрамадинг», — дея ҳазил жавоб қайтарган Атамбаев қўлидан соатини ечиб унга берди.
Президент маъмуриятининг раҳбари Алмаз Усеновнинг маълум қилишича, ушбу соат президент кимнингдир хизматларини алоҳида қайд этганида совға қиладиган соатдир.
Президент Атамабаевнинг ваколати 24 ноябрь куни ниҳоясига етади ва 15 октябрдаги сайловларда ғалаба қучган Сооронбай Жээнбеков янги мамлакат раҳбари сифатида қасамёд келтиради.
Изоҳ (0)