Хитойда ақлбовар қилмас даражада чиройли кутубхона очилди. Лекин китоблар ҳақиқий эмас, чизилган экан!

Октябрь бошида Хитойнинг Тяньцзинь шаҳрида Бинхай кутубхонаси очилди. Meduza’нинг ёзишича, футуристик бино Голландиянинг MVRDV архитектура бюроси томонидан лойиҳалаштирилган.

Кутубхонанинг марказий залида оқ шар бор, унинг устида — гумбаз, кўплаб китоб токчалари эса аста шифтга уланиб кетган. Кутубхона Тяньцзинь аҳолиси орасида оммабоп ташриф жойига айланди, суратлари эса ижтимоий тармоқларда вирусли тарзда тарқала бошлади.

Кутубхона очилганидан бир ой ўтиб, фотобанкларда чиройли зал токчаларида аслида китоб йўқлигини кўрсатувчи фотосуратлар пайдо бўлди — узоқдан китобдек кўриниб турган лавҳалар аслида чизилган экан.

Кутубхона директори ўринбосари Сюфен Люнинг сўзларига кўра, шаҳар маъмурияти марказий зал токчаларига китоб қўйишга рухсат бермаган, китобларни кутубхонанинг бошқа залларидан топиш мумкин. «Суратлар ва ҳақиқий вазият ўртасида катта фарқ бор», — дея қайд этди муассаса ташрифчиларидан бири.

Люнинг айтишича, суратларда кўриниб турган оз миқдордаги ҳақиқий китоблар ҳам токчаларга вақтинча қўйилган. Кутубхона бу китобларни ҳам яқин вақт ичида олиб ташлаши керак.