Самарқанд шаҳар жиноят ишлари бўйича суди томонидан Ўзбекистон ҳудудига ноқонуний олиб кирилган катта миқдордаги контрафакт электр ҳисоблагичлар ҳолати бўйича қўзғатилган жиноят иши кўриб чиқилиши якунланди, деб хабар берди Давлат божхона қўмитаси матбуот хизмати.
Жиноят иши материалларига кўра, ушбу қурилмалар Хитойдан «Улуғбек» темир йўл станцияси орқали Самарқанд вилоятида фаолият юритаётган «Шарқ Саноати» концерни таркибига кирадиган Afrosiyob-Jeans қўшма корхонаси номига юборилган.
Самарқанд вилояти божхона бошқармаси ходимлари томонидан декларацияланмаган умумий миқдори 2120 дона электр ҳисоблагичлар контейнерни божхона назоратидан ўтказиш вақтида аниқланди.
Олиб борилган тергов ҳаракатларига кўра, ушбу ҳисоблагичлар контрафакт товарлар бўлиб, расмий рўйхатдан ўтган Ўзбекистон ва Россиядаги корхоналар товар маркаси остида ишлаб чиқарилганлиги, барча техник паспортлар ва мувофиқлик сертификатлари сохталаштирилганлиги аниқланган. Мазкур қурилмаларнинг қиймати 300 миллион сўмдан ортиқни ташкил этади.
Тергов давомида аниқланишича, Самарқандда яшовчи 1991 йилда туғилган С. Хушвақтов ва 1988 йилда туғилган А. Камолов олдиндан жиноий тил бириктириб, жуда катта миқдорда товарларни божхона назоратидан яшириб, божхона юк декларацияси ва бошқа тегишли ҳужжатларида кўрсатмаган ҳолда Ўзбекистон божхона чегараси орқали ўтказиш жиноятини содир этган.
Самарқанд шаҳар жиноят ишлари бўйича судининг 3 ноябрдаги ҳукмига мувофиқ судланувчи С. Хушвақтов ва А. Камолов Жиноят кодексининг 182-моддаси 2-қисмининг «а» банди билан айбдор деб топилган.
Судланувчи С. Хушвақтовга нисбатан энг кам ойлик иш ҳақининг 160 баравари миқдорида (23964000 сўм) ва судланувчи А. Камоловга нисбатан энг кам ойлик иш ҳақининг 140 баравари миқдорида (20968500 сўм) жарима жазоси ундирилиши белгиланди.
Суд қарорига биноан, жиноят ишининг далилий ашёси сифатида олиб қўйилган 2120 дона электр ҳисоблагичлар белгиланган тартибда йўқ қилинади.
Изоҳ (0)