Хоразм вилоят солиқ хизмати органлари Мажбурий ижро бюроси ҳудудий бўлимлари билан ҳамкорликда суд ҳужжатлари асосида солиқ қарзларини ундиришга қаратилган кенг қамровли тадбирларни амалга оширмоқда. Бу ҳақда «Дарё»га вилоят солиқ бошқармаси жамоатчилик билан алоқалар ва ҳуқуқий ахборот бўлими маълум қилди.
Хусусан, Қўшкўпир туманида жорий йилнинг ўтган даври мобайнида суд ҳужжатлари асосида юридик ва жисмоний шахсларнинг 3,6 миллиард сўмлик солиқ қарздорлиги давлат бюджетига ундирилди. Бундан 3 миллиард 550 миллион сўми юридик шахслар томонидан ўз муддатида тўланмаган солиқлар ҳамда давлат мақсадли жамғармаларига ажратмаларга тўғри келса, 40 миллион сўмдан ортиқ қисми жисмоний шахслар томонидан тўланадиган қатъий белгиланган солиқ ва маҳаллий солиқлар ҳиссасига тўғри келади.
Олиб борилган ишлар натижасида қарздорликлар 4,7 миллиард сўмга қисқартирилишига эришилди. Унинг 1,8 миллиард сўми фермер хўжаликлари, 300 миллион сўми ишлаб чиқариш ва хизмат кўрсатиш корхоналари, 115 миллион сўми «Ўзавтойўл» концерни тизимидаги корхоналар ҳамда 113 миллион сўми қишлоқ хўжалиги корхоналари улушига тўғри келмоқда.
2015 йилда банкротлик асосида тугатилган Қўшкўпир туманидаги «Пир-Нодир» фермер хўжалиги хўжалиги раҳбарига тегишли Cobalt автомобили ҳатловга олиниб, 9,2 миллион сўм миқдордаги солиқ ва бошқа мақсадли жамғармалардан бўлган қаздорлиги ундириб олинди.
Тумандаги «Матрасул Бекчон Элотком» фермер хўжалиги 2016 йилда банкротлик асосида тугатилган, бироқ мазкур фермер хўжалиги раҳбари ҳам шу пайтга қадар солиқ ва бошқа мақсадли жамғармалар учун тўловларни ўз вақтида амалга оширмаганди. Шу сабабли унга тегишли Matiz машинаси ҳатловга олиниб, 2,2 миллион сўм солиқ ва бошқа мақсадли жамғармалардан бўлган қаздорлиги ундирилди.
Изоҳ (0)