Тошкентлик Ирина Зайдман ва Мария Леглер рухсат этилмаган йиғилишлар уюштиргани учун мос равишда 10 ва 15 сутка маъмурий қамоқ жазоси билан жазоланди. Бу ҳақда, Тошкент шаҳар ИИББ бошлиғи ўринбосари, Тергов бошқармаси бошлиғи Дониёр Тошхўжаевга асосланиб, «Газета.uz» хабар берди.
Тошхўжаевнинг сўзларига кўра, июнь ойида ижтимоий тармоқлар, хусусан, Facebook воситасида Ирина Шоҳназарова (Зайдман)нинг фаол иштирокида фуқаролар учрашуви уюштирилган. Бунда гап Боровский номидаги Тошкент тиббиёт коллежи ўқувчиси Жасурбек Иброҳимовнинг ўлимида айбдорларни жазолаш талаби билан Ўзбекистон ИИВга мурожаат остида имзо чекиш масаласида Дўстлик боғида бўлган учрашув ҳақида бормоқда.
Мария Головко (Леглер) эса 26 сентябрь куни жониворлар ҳимояси йўлида ҳукуматга мурожаат қилиш мақсадида Яккасарой туманидаги Пушкин ҳайкали олдида имзо тўплашни уюштирган.
ИИББ маълумотларига кўра, мазкур икки ҳолатда ҳам фуқаролар учрашувини уюштириш учун рухсат олинмаган. Ҳуқуқни муҳофаза қилиш органлари томонидан тўпланган маълумотлар айнан шу икки аёл мазкур учрашувларни уюштирганини кўрсатган. Ирина Шоҳназарова учрашув жойи ва вақтини кўрсатиб, ўз телефон рақамини қолдирган, Мария Головко эса мурожаат матнини тайёрлаб, уни фуқаролар имзолаши учун чоп этган.
10 ноябрь куни Мария Головко Маъмурий жавобгарлик тўғрисидаги кодекс (МЖтК)нинг қуйидаги моддалари бўйича маъмурий жавобгарликка тортилган: 201 (Йиғилишлар, митинглар, кўча юришлари ёки намойишлар уюштириш, ўтказиш тартибини бузиш), 202 (Рухсат этилмаган йиғилишлар, митинглар, кўча юришлари ва намойишлар ўтказиш учун шароитлар яратиш) ва 202-1 (Ғайриқонуний нодавлат нотижорат ташкилотлари, оқиимлар, секталарнинг фаолиятида қатнашишга ундаш). Унга нисбатан 10 кун муддатга маъмурий қамоқ кўринишида жазо қўлланилган, шунингдек, энг кам иш ҳақи (ЭКИҲ)нинг 60 баробари (8,98 миллион сўм) миқдорида жарима солинган.
15 ноябрь куни Ирина Шоҳназарова МЖтКнинг 201- ва 202-моддалари бўйича жавобгарликка тортилган. У 15 сутка маъмурий қамоқ ва ЭКИҲнинг 50 баробари (7,48 миллион сўм) миқдорида жарима билан жазоланган.
«Газета.uz»нинг бу аёллар нима учун шунча фурсат ўтганидан сўнг жавобгарликка тортилгани ҳақидаги саволга жавоб бераркан, Дониёр Тошхўжаев бу далилларни тўплаш билан боғлиқ бўлганини таъкидлади.
ИИББ бошлиғи ўринбосарининг қайд этишича, судда аёллар шаҳар маъмуриятидан рухсат олмай, хатога йўл қўйганини тан олган. Тошхўжаевнинг маълум қилишича, бундан кейин ҳар иккала аёл қонуний асосда ҳаракат қилишга ваъда берган.
Дониёр Тошхўжаев аёллар қоидабузарликлар билан қўлга олингани, суд мажлислари ёпиқ ва адвокатларсиз ўтгани ҳақидаги ахборотни рад этди (буни Ирина Шоҳназарованинг оиласига яқин манба «Газета.uz»га тасдиқлади).
Тошхўжаевнинг таъкидлашича, Ирина Шоҳназарова ва Мария Головконинг жавобгарликка тортилиши ИИББ шу йўл билан фуқароларга қандайдир огоҳлантирув бераётганини англатмайди. «Биз ҳуқуқий давлатда яшаяпмиз, бизда қонун ва ўрнатилган тартиб бор. Қонун билан ўрнатилган тартибда ҳар қандай рухсат этилмаган йиғилишлар, митинглар, имзо тўплашларнинг олди олинади. Ташкилотчилар қонунчиликка мувофиқ жавобгарликка тортилади. Биз кимнидир қўрқитмоқчи эмасмиз, биз ҳаммаси қонун доирасида бўлишини истаймиз», — деди Дониёр Тошхўжаев.
ИИББ бошлиғи ўринбосарининг қайд этишича, кўп миқдордаги одамлар иштирокида тадбирларни ўтказиш вақтида турли кўнгилсиз ҳодисаларнинг олдини олиш мақсадида фуқароларнинг хавфсизлиги, ёнғин хавфсизлиги ва жамоат тартиби таъминланган бўлиши лозим.
Ҳозирги вақтда Ирина Шоҳназарова ва Мария Головко Тошкент шаҳар ИИББ ҳузуридаги реабилитация марказида бўлиб турибди.
Изоҳ (0)