Қашқадарё вилоятида жами 717 минг 325 оила мавжуд бўлиб, уларнинг 545 минг 364 таси суюлтирилган газдан фойдаланади. ЎзА хабарига кўра, аҳолига турли русумдаги 128 махсус автомашинада суюлтирилган газ етказилмоқда. Қўшимча яна олтита Isuzu автомашинасини олишга эҳтиёж мавжуд.
Республика ишчи гуруҳининг тезкор ўрганишлари натижасида Китоб, Шаҳрисабз, Яккабоғ, Қамаши ва Деҳқонобод туманларининг тоғли, қор ёққанда машина ўта олмайдиган 33 қишлоғидаги 24 минг аҳолига декабрь ва январь ойлари учун 2 ойлик захира газ баллонлари етказиб бериш зарурлиги аниқланди.
Шу мақсадда Бухородан қўшимча 5 мингта газ баллони олиб келинди. Тоғли ҳудудларга захира газ баллонлари етказиб берилди.
Суюлтирилган ҳар бир газ баллони нархи 6 минг 552 сўм. Ижтимоий ёрдамга муҳтож, ногирон ва боқувчисини йўқотган оилаларга газ плитаси ва газ баллони бепул берилди.
Туман марказидан 35 километр узоқликда жойлашган Сумак қишлоғининг қиш мавсумида марказ билан алоқаси узилиб қолади.
Буни ҳисобга олган туман газ идораси масъуллари хонадонларнинг деярли барчасига суюлтирилган газ баллонлари тарқатди. Уларга икки ойлик захира газ баллонлари тарқатилди.
Изоҳ (0)