JV Man Auto-Uzbekistan Ўзбекистон—Германия қўшма корхонаси MAN Lion’s Coach шаҳарлараро ҳаракатланувчи автобуслар ишлаб чиқаришни ўзлаштиради. Бу ҳақда, компания матбуот хизматига асосланиб, «Газета.uz» хабар бермоқда.
Бу ҳақдаги тегишли келишувлар Ўзбекистон ҳукумат делегациясиниг Германияга расмий ташрифи ва Ўзбекистон—Германия бизнес-форуми доирасида «Ўзавтосаноат» ва MAN Truck & Bus AG компаниялари ўртасида имзоланган.
Лойиҳани 2018—2020 йиллар давомида JV Man Auto-Uzbekistan’нинг Самарқандда мавжуд тегишли майдонларида амалга ошириш режалаштирилган.
MAN Lion’s Coach — премиум таснифга оид, серияли тарзда ишлаб чиқарилувчи тўлиқ ҳажмли сайёҳлик автобусларидир. Янги автобусларнинг ишлаб чиқарилиши Ўзбекистон аҳолисига кўрсатилаётган шаҳарлараро транспорт қатновлари хизмати сифати ва сонини оширишга ёрдам бериши кутилмоқда.
Аввалроқ JV MAN Auto-Uzbekistan корхонаси паст полли MAN A22 CNG (сиқилган табиий газда, СТГ) шаҳар автобусларини ишлаб чиқаришни ўзлаштирган эди.
2009 йилда асос солинган JV MAN Auto-Uzbekistan компанияси MAN техникаларининг кўплаб турларини, хусусан, автобуслар, эгарчи (тягачлар), ағдарма (самосваллар), бетон қорувчи, сув ташувчи, чиқинди ташувчи, ювувчи — жами 50 дан зиёд номдаги махсус техникаларни ишлаб чиқаради.
Эслатиб ўтамиз, аввалроқ Ўзбекистон ҳукумат делегациясининг Германияга ташрифи доирасида «Ўзавтосаноат» ва Volkswagen ўртасида Ўзбекистонда Volkswagen Amarok пикапларини ишлаб чиқариш бўйича келишув имзоланган эди. Мазкур моделлар ҳам Самарқанддаги JV MAN Auto-Uzbekistan майдонларида йиғилади.
Мавзуга доир: Volkswagen Ўзбекистонда Amarok пикапини ишлаб чиқаради
Изоҳ (0)