ПФЛ бош директори Омон Ғофуров Фарғонанинг «Нефтчи» клуби қуйи лигага тушиб кетмаганини маълум қилди

Ўзбекистон Олий Лигасининг 2016 йилги мавсумида 12-ўриндан юқорига кўтарила олмаслиги маълум бўлган Фарғонанинг «Нефтчи» клуби, ўз тарихида илк бор қуйи лигага равона бўлганди.

Фарғонанинг «Нефтчи» клуби Вадим Абрамов бошқарувида тарихда илк бор Олий Лигадан тушиб кетди

Кеча — 16 ноябрь куни Спорт-ТВ каналининг «Гол» кўрсатувида меҳмон бўлган ПФЛ бош директори Омон Ғофуров, хулосага шошилмаслик кераклигини таъкидлади ва «Нефтчи» Биринчи Лигага тушиб кетмаганини маълум қилди.

«Нефтчи» вакиллари жамоа Биринчи Лигага тушиб кетгани ҳақидаги турли ОАВларда берилган хабарлар ҳақиқатга қанчалик тўғри келиши борасида биздан сўради. Ваҳоланки, ПФЛ расмий сайтида бундай маълумот ҳали чиқмади. Демак, «Нефтчи» Олий Лигадан тушиб кетмади.

Омон Ғофуров, ПФЛ бош директори

Ташкилот раҳбарининг айтишича, 2018 йилни Олий Лигада ўтказишни истаган клублар лицензиялаш масаласини тўғри ҳал қилиши шарт. Шундай хулосага келиш мумкинки, Олий Лигада 11-ўриндан пастга тушиб кетган жамоалар ҳам элитадаги ўрнини сақлаб қолиши мумкин. Бунда ўша жамоа лицензиялашни тўғри бажариши, 11-ўриндан юқорида бўлган қайсидир клуб эса аксинча, ишни ҳал қила олмаслиги керак.

Вадим Абрамов: Жамоалар 12 та қолар экан. Футболчилар шокда, машғулотларни йиғиштириб қўяверайликми?

ПФЛ сайти бунгача 2017 йилги мавсум якунларига кўра, Олий Лигада 1—11-ўринларни эгаллаган клублар ўз ўрнини сақлаб қолиши, қолганлар эса Биринчи Лигага сургун қилиниши, ўз навбатида, Биринчи Лига чемпиони Олий Лигага қўшилиши ҳақида баёнот бериб улгурганди. 2017 йил стартида эса Олий Лига клублари бундан воқиф қилинмаганди.

2018 йилдан бошлаб Ўзбекистон Олий Лигасида 12 та футбол клуб қолади. Қолганлар қуйи лигага сургун бўлади

«Нефтчи»дан ташқари, «Шўртан» ва «Обод»нинг ҳам Олий Лигада ўйнамаслиги ойдин бўлиб улгурганди. «Обод» чемпионатдан четлаштирилди. «Шўртан» лигада муваффақиятсиз иштирок этгани баробарида, ФИФА талабига кўра ҳам келаси мавсумни қуйи лигада ўтказиши керак эди.