Angry birds яратувчиси Таллиндан Хельсинкига туннель қуришни режалаштирмоқда

Таллин ва Хельсинки яқин вақт ичида темирйўл туннели билан боғланиши мумкин, деб ёзади «ТАСС».

Фин кўрфази орқали сувости йўли қурилиши билан оммабоп компьютер ўйини Angry birds яратувчиси Петер Вестербакка шуғулланишни режалаштирмоқда.

Яқинда Rovio компанияси маркетинг департаменти раҳбари лавозимини тарк этган тадбиркорнинг сўзларига қараганда, лойиҳа Финляндия ва Эстония томонидан маъқулланган тақдирда туннель қурилиши кейинги йилданоқ бошланади. «Техник жиҳатдан бу муаммо эмас. Уни беш йил ичида барпо этиш мумкин. Шу тариқа у 2030 йилларда эмас, 2020 йилларда тайёр бўлиши мумкин», — дейди Вестербакка.

Бўлажак темирйўл тармоғида соатига 350 километргача тезликка эриша оладиган тезюрар поездни ишга тушириш режалаштирилмоқда. 50 еврога чипта харид қилган йўловчи Таллиндан Хельсинкигача бўлган йўлга атиги 20 дақиқага яқин вақт сарфлаши мумкин. Бундан ташқари, Вестербакка мунтазам юк ташишни йўлга қўйишни режалаштирмоқда.

Лойиҳанинг тахминий қиймати 15 миллиард еврога баҳоланмоқда. Вестербака қурилиш давлат маблағларини жалб этишни талаб қилмаслигини таъкидлайди.