The New York Times нашри ҳаётимизни бутунлай ўзгартириб юбориши мумкин бўлган бешта технологияни санаб ўтди, деб ёзади Hi-Tech Mail.Ru.
Рўйхатнинг биринчи поғонасини тиббиётдаги сунъий интеллект эгаллади. Тизим тасвирларни таҳлил қилиб, касалликлар белгиларини топиши ва ташхис қўйиши мумкин. Миллионлаб фотосуратларни таҳлил қилиб ўрганган нейротармоқлар ҳозирданоқ диабет, саратон ва бошқа хасталикларни аниқлашга қодир.
Иккинчи ўринда — мулоқот қила оладиган компьютерлар. Google, Facebook ва Microsoft одамнинг смартфонлар, автомобиллар ва бошқа гаджетлар билан алоқасини бутунлай ўзгартиришга ваъда бермоқда.
Ақл ёрдамида бошқариш технологияси — учинчи ўринда. Экспертлар келажакда машиналар одамлар билан эркин мулоқот қилишдан ташқари, уларнинг фикрларини ҳам ўқий олишини айтмоқда. Масалан, об-ҳаво маълумотини билиш ёки кимнингдир рақамини териш учун бу ҳақда ўйлаш кифоя. Бунда электроэнцефалография — бош мияни тадқиқ қилишнинг кенг тарқалган усули ёрдам бериши мумкин.
Учар автомобиллар рўйхатнинг тўртинчи поғонасида жойлашди. Google асосчиси Ларри Пейж учар автомобилларни ишлаб чиқувчи Kitty Hawk компаниясини молиялаштирмоқда, апрелда стартап улкан мультикоптерга ўхшаш Kitty Hawk Flyer «учар машина»сини тақдим этган эди.
Квант компьютерлар — бешинчи ўринда. Улар бугунги кундаги компьютерлардан кўп марта кучлироқ бўлади: дунёда энг кучли ҳимоя қилинадиган маълумотларга 1—2 сонияда бузиб кириш мумкин бўлади. Шунингдек, экспертлар фикрича, квант компьютерларнинг пайдо бўлиши молиявий бозорларни, таълим тизимини, транспортни ва бошқаларни тубдан ўзгартириб юборади.
Изоҳ (0)