Швейцариянинг Лозанна федерал политехника мактаби мутахассислари данио-рерио балиғининг робот кўринишини яратди. У ўз турдошларини кузатади. Қурилма ёрдамида олимлар сувости жонзотларининг ўзаро алоқаси ва қарор қабул қилиши билан боғлиқ кўпроқ маълумот олишни кўзламоқда. Бу балиқнинг танланиши бежизга эмас — у юқори тезликда ҳаракатланиши ва ўз йўналишини ўзгартириш одати билан танилган. Бу ҳақда TJournal хабар берди.
«Жосус» балиқнинг узунлиги етти сантиметрни ташкил қилади. Бу ўлчам ҳақиқий балиқлар ўлчамидан бироз узун бўлиб, бошқа жиҳатлардан робот тирик балиқдан фарқ қилмайди. Роботга кичик двигатель билан боғланган магнит ўрнатилган. Двигательнинг ўзи эса аквариум остига жойлаштирилган бўлиб, у робот-балиқни бошқаради. Муаллифлар сифатга ва балиқ думининг ҳаракатчанлигига алоҳида эътибор қаратган. Чунки бу данио-рерионинг мулоқотида асосий жиҳат ҳисобланади.
Тажрибалар тирик балиқлар бўлган кичик аквариумда ўтказилган. Олимлар балиқларнинг роботга нисбатан рексиясини ва унинг қандай қилиб тирик балиқлар «ишончига кирганини» ўрганган. Мутахассислар бир нечта аквариумдан фойдаланган, уларнинг баъзилари коридор шаклида бўлган. Тажрибалар балиқларнинг ўнта турли гуруҳида ўтказилган, уларнинг ҳар бирида тўрттадан балиқ бўлган. Роботнинг ҳақиқийлигига шубҳа қилмаган тирик балиқлар унинг ортидан эргашган.
Тирик балиқларни ишонтириш учун олимлар роботни данио-рерио рангига бўяган, унга сунъий сузгичлар ўрнатган ҳамда роботда балиқларнинг стандарт тезлигини, унинг қондошлари ўртасидаги масофа ва уларнинг думи тебранишини ҳисобга олган.
Назарияга кўра, янги «жосус» биологияга нафақат ҳайвонларнинг ўзини тутишини тушунишда ёрдам бериши, балки гуруҳлар қарорига таъсир қилиш имконини бериши мумкин.
Изоҳ (0)