Туркиянинг шимоли-ғарбий қисмида жойлашган тўртинчи йирик шаҳри — Бурса ўрмон ёнғинлари қуршовида қолди. Ҳудудда юз берган ёнғинлар оқибатида камида 1 700 дан ортиқ аҳоли хавфсиз жойга эвакуация қилинди, бир нафар ўт ўчириш ходими ҳалок бўлди. Бу ҳақда Anadolu хабар берди.
Бурса ҳокимлигига кўра, 28 июль куни 1 765 нафар одам хавфсиз жойга эвакуация қилинган. Ёнғинларга қарши курашда 1 900 дан ортиқ ўт ўчирувчи ва 500 нафар қутқарувчи жалб этилган.
27 июлга ўтар кечаси тоғларда бошланган ёнғин тезлик билан тарқалиб, Бурса осмони қизғиш тусга кирган. Оқибатда шаҳарни пойтахт Анқара билан боғловчи асосий автомобиль йўли ёпилган. Шаҳар мери Мустафа Бозбей ёнғинлар 3 минг гектардан ортиқ майдонни қамраб олганини ва бир нафар ўт ўчирувчи юрак хуружидан вафот этганини маълум қилган.
Туркия ўрмон хўжалиги вазири Иброҳим Юмакли берган маълумотга кўра, мамлакат бўйлаб жами 84 та йирик ёнғинга қарши кураш олиб борилмоқда. Айниқса, Karabuk вилоятида вазият оғир бўлиб, у ерда ёнғинлар 22 июлдан бери давом этмоқда.
Ёнғинларнинг авж олишига мисли кўрилмаган иссиқ ҳаво, қурғоқчилик ва кучли шамоллар сабаб бўлмоқда. Юмаклининг сўзларига кўра, ҳозирда 6 та самолёт ва 4 та вертолёт ҳодисани бартараф этишга сафарбар қилинган.
“Оғир кунлардан ўтяпмиз. Бу ҳолат икки-уч кунда тугайдиганга ўхшамаяпти”, деди у.
Адлия вазири Йилмаз Тунч маълум қилишича, 26 июндан буён 33 вилоятда содир бўлган ёнғинлар юзасидан суриштирув ишлари олиб борилмоқда. 97 киши устидан ҳуқуқий чоралар кўрилган.
Туркия Метеорология бош бошқармасига кўра, 26 июль, жума куни жануби-шарқдаги Ширнак вилоятида ҳарорат 50,5 даражага етиб, мамлакат тарихидаги энг юқори кўрсаткич қайд этилган. Июль ойида умумий 132 та ҳудудда рекорд даражадаги ҳарорат кузатилган. Аввалги рекорд эса 2023 йил 15 август куни ўрнатилганди. Ўшанда Саричакая ҳудудида 49,5 даража иссиқ қайд этилган.
Изоҳ (0)