Ўзбекистонда нақд хорижий валютанинг эркин сотилиши масаласи халқаро пресс-клубнинг валюта сиёсатини либераллаштиришга бағишланган сессиясида муҳокама қилинди. Бу ҳақда «Новости Узбекистана» хабар бермоқда.
Марказий банк раиси ўринбосари Ботир Зоҳидовнинг сўзларига қараганда, ҳозир фуқароларда ҳар қандай айирбошлаш пунктидан чет эл валютасини халқаро пластик картага олиш имконияти мавжуд. Нақд пулнинг айланиши шундай эркин йўлга қўйилиши учун эса кутиш керак бўлади.
«Валюта ҳозир нақдсиз шаклда сотилаётгани ҳақида. Бу вақтинчалик чора. У курс асоссиз равишда ўсишига йўл қўймаслик ва спекулятив операцияларнинг олдини олиш мақсадида жорий этилган. Албатта, биз маълум муддатдан сўнг нақд пул сотилишини йўлга қўйишни режалаштирмоқдамиз. Конкрет муҳлатларни айтиш қийин, аммо биз бунга келишимиз шубҳасиз», — деди Зоҳидов.
Марказий банк раисининг биринчи ўринбосари Тимур Ишметов ислоҳотларда босқичма-босқичлик муҳимлигини таъкидлаб ўтди. Барча масалалар, шу жумладан, нақд валюта сотилиши ҳам секин-аста ҳал қилинади. Бунда, амалдорнинг сўзларига қараганда, бу иқтисодиётнинг, умуман олганда, энг аҳамиятсиз қисмидир.
«Курс девальвациясининг ўтказилиши ва аҳолига валюта сотиб олиш имкониятини очиш — бу барча кутган муҳим қадам. Аммо бу биринчи қадам. Ҳали ўрганадиган ва амалга оширадиган кўп иш бор. Ислоҳотнинг биринчи ярим йиллик якунларига кўра Президент янги шароитдаги тажрибани инобатга олган ҳолда валюта назорати ҳақидаги қонунни кўриб чиқиб, қайта ёзишни топширди. Ҳозир биз тадбиркорлар ва жисмоний шахсларнинг муаммоларини синчиклаб ўрганмоқдамиз. Ушбу барча нюансларни янги қонун лойиҳасини тайёрлашда инобатга оламиз. Ислоҳот албатта якунланади. Асосий критерий — ислоҳотлар ортга қайтмаслигини таъминлаш. Бошлаган эканмиз, ишни охирига етказишимиз, ҳеч ҳам ортга қайтмаслигимиз лозим», — тушунтирди Ишметов.
Марказий банк вакилларининг сўзларига қараганда, ислоҳот шубҳасиз якунига етказилади, барча нюанслар ҳал қилинади. Нақд валютанинг жисмоний ва юридик шахсларга эркин сотилиши, шунингдек, республика банкларида айирбошланадиган чет эл валютаси рўйхатини кенгайтириш шулар жумласидандир.
Изоҳ (0)