Ўзбекистонда Тошкентдаги республика тиббиёт муассасаларидан бориб, вилоятларда фаолият бошлаган мутахассисларнинг меҳнатини муносиб баҳолаш чоралари кўрилди, дея хабар бермоқда Соғлиқни сақлаш вазирлиги (ССВ) матбуот хизмати.
Хабар беришларича, 10 ноябрь куни ССВ, Бандлик ва меҳнат муносабатлари вазирлиги ҳамда Молия вазирлигининг «Тиббиёт муассасаларини моддий рағбатлантириш ва ривожлантириш жамғармаси тўғрисидаги низомга ўзгартириш ва қўшимча киритиш ҳақида»ги қарори қабул қилинган.
Унга кўра, республика тасарруфидаги тиббиёт муассасаларидан вилоят тасарруфидаги тиббиёт муассасаларига раҳбар лавозимларга юборилган ходимларнинг тариф ставкаларига 50 фоиз миқдорида ойлик устама ҳақи тўланиши белгиланди.
ССВ матбуот хизматининг қайд этишича, тиббиёт муассасаларини моддий рағбатлантириш жамғармаси маблағлари самарали ҳамда мақсадли ишлатилишига тиббиёт муассасаси қошидаги махсус комиссия ва муассаса раҳбарлари жавобгар ҳисобланади.
Маълумот учун, вилоятларда ишлаш ташаббуси билан чиққан етакчи мутахассислардан 134 нафар номзод танлаб олиниб, вилоятлардаги кўп тармоқли тиббиёт марказлари, болалар шифохоналари, эндокринология, кардиология, силга қарши, тери-таносил диспансерлари, онкология маркази филиаллари, юқумли касалликлар шифохоналарига юборилгани ҳақида аввал хабар берилган эди.
Изоҳ (0)