15 ноябрь куни Ўзбекистон Олий Мажлиси Қонунчилик палатасининг навбатдаги мажлиси бўлиб ўтди, дея хабар бермоқда ЎзА. Депутатлар мажлис давомида «‘Келажак бунёдкори’ медалини таъсис этиш тўғрисида»ги қонун лойиҳасини биринчи ўқишда кўриб чиқди.
«Келажак бунёдкори» медалининг таъсис этилиши муҳимлиги ва зарурлигини таъкидлаб, депутатлар қайд этдиларки, ушбу медаль ёшларнинг юксак марраларга интилишлари учун муҳим омил бўлиб хизмат қилади.
Мамлакатимиз Президенти ёшлар масалаларини кун тартибига қўяётгани бежиз эмас. Барчага маълумки, бу йил давлатимиз раҳбари ташаббуси билан Ўзбекистон ёшлар иттифоқи ташкил этилди. Президент Шавкат Мирзиёев ўз нутқида таъкидлаганидек, бизнинг энг муҳим йўналишимиз — бу ёшлар. Ушбу масалани ҳал этсак — катта ўзгаришларга эришамиз. Ёшлар барча соҳаларда фаол бўлиб, ютуқларга эришаётгани, ўз фаолиятини такомиллаштиришга интилаётгани эндиликда янгилик эмас. Медальнинг таъсис этилиши истиқболга бўлган давлат эътиборининг ёрқин мисолидир.Таъкидландики, «Келажак бунёдкори» медали билан халқ манфаатлари йўлида садоқат билан хизмат қилаётган, юксак ватанпарварлик, фидойилик ва меҳнатсеварлик фазилатларини намоён этиб келаётган, Ватаннинг халқаро майдондаги обрў-эътибори ва шон-шуҳратини юксалтиришга муносиб ҳисса қўшаётган, жамият ижтимоий-сиёсий ҳаётида фаоллиги ва ташаббускорлиги билан тенгдошларига ўрнак бўлаётган, ўқишда ва меҳнат фаолиятида катта ютуқларга эришган 14 ёшга тўлган ва 30 ёшдан ошмаган ёшлар мукофотланади.Абдуғаффор Қирғизбоев, Олий Мажлис Қонунчилик палатаси депутати
Бундан ташқари, ушбу медаль билан мукофотланган шахслар энг кам ойлик иш ҳақининг 10 баравари миқдорида бир йўла тўланадиган пул мукофоти олади ва қонун ҳужжатларида белгилаб қўйиладиган имтиёзлардан фойдаланади.
Изоҳ (0)