Нью-Йоркдаги аукционда салкам ярим млрд долларлик картиналар сотилди

Нью-Йоркда 13 ноябрь, душанба куни навбатдаги Christie's аукциони бўлиб ўтди. Бу ҳақда «ТАСС» хабар бермоқда.

Аукционга америкалик филантроп Перри Басс ва унинг турмуш ўртоғи Нэнси Ли тўплаган коллекцияга мансуб 60 дан ортиқ асар, жумладан, Анри Матисс, Клод Моне, Марк Шагал, Пабло Пикассо, Василий Кандинский картиналари қўйилди.

Унинг якунлари бўйича қўлга киритилган жами сумма 479 миллион долларни ташкил этди. Энг қиммат лот — Винсент Ван Гогнинг «Ҳайдалган дала ва деҳқон картинаси» 81,3 миллион долларга сотилди. Сурат дастлаб 50 миллион доллар атрофида баҳоланганди.

Унда Ван Гог умрининг охирги йилларида даволанган Франциядаги касалхона деразасидан кўринган манзара акс эттирилган.