Ўзбекистон Вазирлар Маҳкамаси йўл ҳаракати хавфсизлигини таъминлаш мақсадида 4 сентябрь куни «Ҳайдовчиларни тайёрлаш ва қайта тайёрлаш тартибини такомиллаштириш ҳамда ўқитишнинг инновацион усулларини қўллаган ҳолда уларнинг малакасини ошириш тўғрисида»ги 693-сонли қарорни қабул қилди.
Қарор йўл ҳаракати хавфсизлигини, фуқароларнинг ҳаёти ва саломатлигини таъминлаш, ЙТҲлардан огоҳлантириш бўйича чораларни кучайтириш ҳамда ташкилотлар ҳайдовчилари малакасини ўқитишнинг инновацион усулларини қўллаган ҳолда ошириш тартибларини такомиллаштириш мақсадида қабул қилинди.
Ҳужжатга кўра, 2018 йилнинг 1 январидан юридик шахсларга тегишли автотранспорт воситалари ҳайдовчилари икки йилда бир малака ошириш курсларида ўқиши шарт.
Машғулотларни ўтказиш Avtotest компаниясига ишониб топширилди, сабаби бугунги кунда компания замонавий ўқитиш усули ва техник ускуналарига эга ва ҳайдовчилар малакасини ошириш курсларини ташкил этиш учун зарур талабларга мос келади.
6 ноябрь куни Avtotest марказий ўқув мажмуасида Ўзбекистоннинг барча ҳудудларидаги автотранспорт воситалари ҳайдовчиларининг малакасини ошириш марказларининг очилишига тайёргарлик жараёнларига бағишланган медиатур ташкил этилди. Медиатур иштирокчилари автомактабда яратилган шароитлар, унинг моддий-техник, ўқув-методик базаси, шунингдек ўқитувчилар тажрибаси билан танишди.
Ҳайдовчилар малакасини ошириш марказлари 2018 йилнинг 1 январига қадар иш бошлаши кутилмоқда. Машғулотлар бир ҳафта давом этади. Малака ошириш дарслари нархи энг кам иш ҳақининг икки баробари миқдорида белгиланди. Мазкур тўлов хусусий корхоналарда иш берувчи томонидан, бюджет ташкилотларида эса бюджетдан ташқари маблағлар ҳисобидан амалга оширилади.
Avtotest Report МЧЖ малака ошириш марказларини яратиш ва ривожлантириш учун 25 миллиард сўм йўналтирмоқда. Марказларда мингдан ортиқ иш ўрни яратилади.
Ҳозирги кунда Қорақалпоғистон Республикаси ва барча вилоятларда, хусусан Тошкент шаҳрида ҳам ҳайдовчилар малакасини ошириш марказлари курсларга қабул бошлашга тайёргарлик кўрмоқда.
Изоҳ (0)