Ўзбекистон босқичма-босқич ўз-ўзини молиялаштиришга асосланган нодавлат бюджетдан ташқари нотариатни жорий этишни режалаштирмоқда, дея хабар беради «Газета.uz».
2018 йил 1 январдан бошлаб давлат нотариал идоралари нодавлат идораларга айлантириб борилади. Бу Адлия вазирлиги томонидан ишлаб чиқилган ва муҳокама учун эълон қилинган Президент фармони лойиҳасида кўзда тутилган.
Ўзбекистонда нотариат институтини ислоҳ қилишнинг асосий йўналишлари рўйхатида «нотариал фаолиятнинг самарали, шаффоф тизимини» яратиш ва нотариусларни мунтазам аттестациядан ўтказиш тартибларини жорий этишдан иборат.
Нотариатларни ҳалол ва юқори малакали мутахассислар билан таъминлаш ва юқори даражада хизмат кўрсатишга эришиш ҳам устувор вазифалардан ҳисобланади.
Нотариал идораларни молиялаштиришнинг адолатли шароитларини яратиш орқали нотариусларнинг ўз вақтида ва сифатли хизмат кўрсатишларига эришиш режалаштирилган.
Баҳссиз даъволар бўйича суд қарорларини чиқариш амалиётини қисқартириш ҳисобига қарздордан пул маблағлари ва мол-мулкни ундириш тўғрисидаги нотариуслар ижро қайдларини жорий этишни кенгайтириш белгиланган. Бу суд тизимида иш ҳажмининг сезиларли даражада қисқаришига хизмат қилади.
Ўзбекистон Нотариал палатасини таъсис этиш ва барча нотариусларнинг унга мажбурий равишда аъзо бўлишини йўлга қўйиш кўзда тутилган. Режага кўра, нодавлат палата нотариуслар фаолиятини мувофиқлаштириб, уларнинг ҳуқуқ ва манфаатларини ҳимоя қилади.
Изоҳ (0)