Зимбабве полицияси мамлакат президенти Роберт Мугабени Twitter’да «гоблин» деб атаган АҚШлик аёлни қўлга олди. Бу ҳақда Reuters’га таяниб, Meduza хабар берди.
Қўлга олинган америкаликнинг исми Марта О’Донован. У Зимбабве пойтахти Харареда яшайди ва Magamba TV — сиёсий сатирик шоулар ишлаб чиқариш компаниясида фаолият олиб боради.
Америка фуқароси 3 ноябрь куни ўз хонадонида қўлга олинган. Унинг ноутбуки мусодара қилинган. Полиция унинг уйида «президентни ҳақоратлаш» тергов иши бўйича тинтув ўтказди. Терговга америкалик фуқаронинг «Rolls-Royce сотиб олган ‘гоблин’нинг қариндошлари» ҳақидаги твити сабаб бўлган. О’Донован президент Мугабе исмини ўз твитида келтирмаган.
Марта қўлга олинган кун унинг Twitter’даги аккаунти блокланди.
Қўшма Штатлар фуқаросининг қўлга олинганлигини АҚШнинг Хараредаги элчихонаси ҳам тасдиқлади. Америкалик дипломатлар вазиятни диққат билан кузатаётганини маълум қилди.
Агарда О’Донован айбдор деб топилса, у бир йилгача озодликдан маҳрум қилиниши мумкин.
Эслатиб ўтамиз, 2017 йилнинг сентябрь—октябрь ойларида ОАВлар Зимбабве президентининг рафиқаси ва унинг биринчи никоҳидан туғилган ўғиллари ЖАРда бир нечта Rolls-Royce автомобилларини сотиб олганлиги ҳақида хабар тарқатганди.
Изоҳ (0)