ИШИД террорчилик ташкилотига содиқлик ҳақида қасамёд қилган 29 ёшли Сайфулло Соипов 31 октябрь куни Нью-Йоркнинг Манхэттен қисмидаги велойўлакда саккиз кишини босиб кетди. Ушбу ҳужум теракт сифатида тан олинди. Маълумотларга кўра, Соипов мазкур ҳужумга, ИШИДнинг тарғибот роликларидан илҳомланиб, бир неча ой давомида тайёргарлик кўрган. Meduza нашри нью-йорклик полициячи Райан Нэш террорчини қандай қилиб тўхтатиб қолгани ҳақида ҳикоя қилади.
«Биз шунчаки ўз ишимизни қилдик»
31 октябрь, сешанба куни Нью-Йорк полицияси ходими Райан Нэш шериги Жон Хэсиотис билан чақирув асосида Стайвезент мактабига келди. Полициячиларни мактаб ҳамшираси чақирган эди — ўқувчилардан бири ўз жонига қасд қилмоқчи бўлган. Ҳар эҳтимолга қарши, Нэш ва Хэсиотисга кўмак бериши учун яна икки полициячи чақирилган. Улар ўқув муассасасида бўлган вақтда келиб чиқиши ўзбекистонлик Сайфулло Соипов Чамберс-стритда саккиз кишини машинада босиб кетиб, ўлдирди; Стайвезент мактаби ҳам шу кўчада жойлашган.Тўрттала полициячи ҳам кўчага югуриб чиқиб, воқеа жойидан яширинишга уринган Соиповнинг ортидан қувишга тушди. Соиповнинг ёнида икки тўппонча бор эди — у кўча бўйлаб югураркан, «Аллоҳу акбар», деб бақирарди. Нэш террорчига ҳаммадан ҳам яқинроқ эди. У Соиповга тўхташни буюрди, бироқ у буйруққа бўйсунмади; Нэш хизмат тўппончасини қўлга олиб, қочаётган жиноятчи томон тўққиз марта ўқ узди. Ўқлардан бири Соиповга тегди, у ўлмайдиган даражада яраланди ва ҳозир шифохонада ётибди. Унинг қўлидаги қуроллар жанговар эмас, балки пейнтбол ва пневматик тўппончалар экани аниқланди. Нэшнинг шериклари эса, ўткинчи пиёдаларни пойлаб қўйишдан чўчиб, қуролдан фойдаланмади.
The New York Daily Post’нинг ёзишича, 28 ёшли Нэш қулоғида пайдо бўлган шовқиндан шикоят қилиб шифокорларга мурожаат қилган. У Соиповни қўлга тушириш вақтида ҳеч қандай жароҳат олмаган. Нью-Йорк штати губернатори Эндрю Куомо Нэшни қаҳрамон деб атади, шаҳар мэри Билл де Блазио эса унинг ҳаракатларини ақлбовар қилмас деб атади.
1 ноябрь, чоршанба куни Райан Нэш матбуот анжуманида чиқиш қилиб, жумладан, шундай деди: «Мен, албатта, ҳар куни ишга чиқадиган минглаб полициячилар қатори, ўз ишимизни қилдик, деб ҳисоблайман. Бироқ кечаги воқеалар ва ундаги бизнинг ўрнимиз аҳамиятини яхши тушуниб турибман ва бизга кўрсатилаётган бундай муносабат учун миннатдорчилик билдираман».
У тергов сирига ишора қилиб, Соиповни қўлга олиш тафсилотлари ҳақида гапирмади. Хабар беришларича, Нэш беш йилдан бери полицияда хизмат қилади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)