Сўнгги йилларда эълон қилинган илмий мақолаларга кўра, АҚШдаги Йеллоустон вулқонининг отилиши — яқиқ келажакда Ер юзида содир бўлиши мумкин бўлган энг қўрқинчли ҳодиса ҳисобланади. Ер юзида фаол вулқонлар жуда кўп, бироқ Йеллоустон жиддий хавф туғдиради, уни ҳатто супервулқон дея аташади, деб хабар беради TravelAsk.
Ушбу вулқон Америка Қўшма Штатларининг ғарбий қисмида, Йеллоустон миллий боғи ҳудудида жойлашган. Конуссимон кўринишга эга Йеллоустон калдерасининг узунлиги 55 га 70 километрни ташкил этади. Шу сабабли ҳам у 1960 йилдагина сунъий йўлдош суратлари орқали аниқланган. Олимлар унинг 8 километрлик тубида магма ўчоғи борлигини аниқлаган. Айнаш шу магма Йеллоустон боғидаги кўплаб иссиқ булоқларга иссиқлик етказиб берувчи манба бўлиб хизмат қилади.
Олимларнинг фикрича, ушбу супервулқон камида уч бора отилган: 2,1 миллион йил олдин, 1,3 миллион йил олдин ва 630 минг йил олдин. Шундай қилиб, отилишлар орасидаги вақт оралиғи 700—800 минг йилни ташкил этади. Сўнгги бора отилганида вулқон Ер атмосферасига шу қадар кўп кул чиқарганки, натижада 80 йил давом этган совуқликни келтириб чиқарган.
Олимлар Йеллоустон вулқони ҳисоб-китоблардан анча олдинроқ ҳаракатга келиши мумкинлигини таъкидламоқда. Бунга ушбу ҳудудда тез-тез қайд этилаётган ер силкинишлари исбот бўла олади.
Изоҳ (0)