Андижон шаҳридаги собиқ «Электродвигатель» очиқ акциядорлик жамияти ҳудудида ташкил этилган кичик саноат зонасида автомобиллар учун эҳтиёт қисмлар, алюмин, пластмасса, қурилиш материаллари, саноат ва трикотаж, нон ва қандолат маҳсулотлари ишлаб чиқаришга йўналтирилган 23 та лойиҳа амалга оширилади. Натижада 300 дан зиёд иш ўрни яратилади. Бу ҳақда ЎзА хабар берди.
Умумий майдони 6,5 гектар бўлган мазкур ҳудудда белгиланган лойиҳалар доирасида 9,471 миллиард сўм ҳамда 1,636 миллион доллар миқдордаги инвестиция киритилиб, қатор янги корхоналар ишга туширилди. Айни кунга қадар 21 та корхона фаолияти йўлга қўйилиб, 304 нафар киши доимий иш ўрнига эга бўлди.
Мазкур ҳудудда самарали фаолият юритаётган «And belita» хусусий корхонасида болалар, аёллар ва эркаклар учун 50 дан ортиқ турдаги пайпоқлар ишлаб чиқарилмоқда.
Корхона томонидан қарийб 600 миллион сўм ҳамда 537,9 минг доллар миқдорида инвестиция киритилиб, ишлаб чиқариш цехлари қайта жиҳозланди, Хитойдан 50 дан ортиқ замонавий пайпоқ тўқиш дастгоҳи, бошқа зарур ускуналар олиб келиб ишга туширилди.
Корхонада жорий йилнинг ўтган тўққиз ойи давомида умумий қиймати 2,5 миллиард сўмга яқин 1,6 миллион дона пайпоқ ишлаб чиқарилди. Айни кунда корхонанинг тўқиш, қадоқлаш цехларида 45 нафар хотин-қиз меҳнат қилмоқда.
Корхона мутахассислари келгуси йилдан бошлаб корхона маҳсулотларини экспорт қилиш бўйича россиялик ҳамкорлар билан келишув тузиш бўйича иш олиб бормоқда.
«Lucky paper» масъулияти чекланган жамиятида эса Хитой технологияси асосида яроқсиз қоғозлар қайта ишланиб, қадоқлаш, ўров қоғозлари ишлаб чиқариш йўлга қўйилган.
Электр энергияси, сув таъминоти масалалари тўла-тўкис ҳал этилган. Ҳозир корхонада асосан 130 дан 160 миллиграммгача бўлган қалинликдаги ўров қоғозлари ишлаб чиқарилмоқда. Маҳсулотлардан асосан торт, қандолат маҳсулотларини қадоқлаш учун махсус идишлар тайёрланмоқда. 8 киши меҳнат қилаётган корхонамизда жорий йилнинг ўтган даврида қарийб 200 тонна яроқсиз қоғоз қайта ишланиб, 450 миллион сўмлик маҳсулот тайёрланди.
«Стапак ривож» масъулияти чекланган жамияти ўзининг айланма маблағлари ҳисобидан замонавий дастгоҳ сотиб олиб, ишга туширди. Натижада полиэтилен халталар ишлаб чиқариш, шунингдек, плёнкага гул босиш, ёрлиқлар чоп этиш йўлга қўйилди.
Айни кунда 11 киши меҳнат қилаётган ушбу корхонада жорий йилнинг ўтган даврида 500 миллион сўмлик маҳсулот харидорларга етказиб берилди.
Мазкур кичик саноат зонасида тадбиркорларга яратиб берилган қулай шароитлар туфайли «Анд вед строй», «Сегаза қуювчи», "Улкан бизнес инвест», «Садаф мрамор ривож», «Ҳусниддин Абдуқундуз» сингари қатор корхоналар самарали фаолият кўрсатмоқда. Улар томонидан ишлаб чиқарилаётган алюмин деталлар, темир қувурлар, нон ва сут маҳсулотлари ички бозорни тўлдириш, аҳолининг ушбу маҳсулотларга бўлган эҳтиёжини қондириш билан бирга мамлакат иқтисодиётини юксалтиришга хизмат қилмоқда.
Изоҳ (0)