Ўзбекистонга ижтимоий аҳамиятли дориларни нафақат маҳаллий, балки хорижий компаниялар ҳам етказиб бериши мумкин, импорт миқдори чекланмайди. Бу Ўзбекистон Президенти Шавкат Мирзиёевнинг «Ўзбекистон Республикасининг айрим ҳужжатларига ўзгартириш ва қўшимчалар киритиш тўғрисида»ги Фармонида кўзда тутилган, дея хабар беради Norma.
Олдин белгиланган нархлар бўйича сотиладиган ижтимоий аҳамиятли дорилар ва тиббий маҳсулотлар импорти Ташқи савдо вазирлиги томонидан маҳаллий улгуржи ва улгуржи-чакана савдо компаниялари ўртасида Соғлиқни сақлаш вазирлиги томонидан аниқланадиган квоталар чегарасида ўтказиладиган тендер бўйича амалга ошириларди.
Энди Ташқи савдо вазирлиги тендер ўрнига ҳар чоракда фақат жаҳон нархлари конъюнктураси таҳлилини ўтказади ва махсус республика комиссиясига ижтимоий аҳамиятли дорилар ва тиббиёт буюмларининг охирги йўл қўйиладиган импорт шартнома қиймати бўйича таклифлар киритади.
Таклифларни ташқи савдо, иқтисодиёт, молия, соғлиқни сақлаш вазирликлари ҳамда Марказий банк ва Давлат рақобат қўмитасининг вакилларидан иборат ишчи гуруҳ кўриб чиқади. Ишчи гуруҳ ҳисоб-китоби асосида Республика комиссияси импорт шартномалари бўйича охирги йўл қўйиладиган қийматларни белгилайди.
Бундан юқори бўлган нархларда товарни етказиб бериш бўйича импорт шартномалари тузиш та’қиқланади.
Мазкур тоифадаги товарларни фақат маҳаллий улгуржи ва улгуржи-чакана савдо компаниялари томонидан импорт қилиниши тўғрисидаги талаблар ҳамда Соғлиқни сақлаш вазирлиги томонидан квоталаш мумкин эмас.
Изоҳ (0)