Ўзбекистон ва Новосибирск вилояти вакиллари муҳожирлар учун квоталарни сақлаб қолиш масаласини муҳокама қилди

Ўзбекистон ва Новосибирск меҳнат вазирликларининг қўшимча келишувлари ҳамкорликни фаоллаштириш, истиқболда эса мавжуд квоталар миқдорини сақлаб қолиш имконини беради. Бу ҳақда Ўзбекистон делегациясининг Новосибирск вилояти ҳукумати билан учрашуви чоғида Бандлик ва меҳнат муносабатлари вазири ўринбосари Зокир Умаров маълум қилди, дея хабар беради «ТАСС».

«Ўзбекистон фуқаролари учун квоталар қисқартирилиши олдини олиш, ҳатто қайта кўриб чиқилишини ҳам муҳокама этишимиз лозим, деб ўйлайман. Маъмурий жараёнлар, ишга рухсатномалар берилишини соддалаштириш, фуқароларимиз соғлигини суғурталаш масалаларида ҳамкорликни фаоллаштиришни истардик. Бундай келишув миграция борасидаги муносабатларни янада ривожлантиришга туртки берган бўларди», — таъкидлади Умаров.

Новосибирск вилояти ҳукумати муҳожирлар учун квоталар миқдори қисқартирилиши ҳақида жорий йил сентябр ойида маълум қилди. 2018 йили бир неча йилдан бери амалда бўлиб келган 4 мингта ўрнига 3 мингта ишга рухсатнома берилиши таклиф этилмоқда.

Ҳукумат раисининг ўринбосари Владимир Знатоков Ўзбекистон билан қўшимча келишув ноқонуний миграция муаммосига ечим бўлиши мумкинлигини таъкидлади. Расмий маълумотларга кўра, айни пайтда Новосибирск вилояти ҳудудида 25 мингдан ортиқ ўзбекистонлик истиқомат қилади.