O‘zbekiston va Novosibirsk mehnat vazirliklarining qo‘shimcha kelishuvlari hamkorlikni faollashtirish, istiqbolda esa mavjud kvotalar miqdorini saqlab qolish imkonini beradi. Bu haqda O‘zbekiston delegatsiyasining Novosibirsk viloyati hukumati bilan uchrashuvi chog‘ida Bandlik va mehnat munosabatlari vaziri o‘rinbosari Zokir Umarov ma’lum qildi, deya xabar beradi “TASS”.
“O‘zbekiston fuqarolari uchun kvotalar qisqartirilishi oldini olish, hatto qayta ko‘rib chiqilishini ham muhokama etishimiz lozim, deb o‘ylayman. Ma’muriy jarayonlar, ishga ruxsatnomalar berilishini soddalashtirish, fuqarolarimiz sog‘ligini sug‘urtalash masalalarida hamkorlikni faollashtirishni istardik. Bunday kelishuv migratsiya borasidagi munosabatlarni yanada rivojlantirishga turtki bergan bo‘lardi”, — ta’kidladi Umarov.
Novosibirsk viloyati hukumati muhojirlar uchun kvotalar miqdori qisqartirilishi haqida joriy yil sentyabr oyida ma’lum qildi. 2018-yili bir necha yildan beri amalda bo‘lib kelgan 4 mingta o‘rniga 3 mingta ishga ruxsatnoma berilishi taklif etilmoqda.
Hukumat raisining o‘rinbosari Vladimir Znatokov O‘zbekiston bilan qo‘shimcha kelishuv noqonuniy migratsiya muammosiga yechim bo‘lishi mumkinligini ta’kidladi. Rasmiy ma’lumotlarga ko‘ra, ayni paytda Novosibirsk viloyati hududida 25 mingdan ortiq o‘zbekistonlik istiqomat qiladi.
Izoh (0)