Ўзбекистон Биринчи Президенти Ислом Каримовнинг биринчи турмушидан Пётр исмли ўғли бор. Бу ҳақда «Kun.uz» хабар бермоқда.
Хабар беришларича, Ислом Каримов 1960 йиллар бошида биринчи марта Наталя Петровна Кучмага уйланган. Биринчи турмушидан Пётр Каримов исмли ўғли бўлган. Хабарларда Пётр Каримов 1969 йилда таваллуд топгани айтилади.
Маълумотларга кўра, Наталя Кучма 2008 йили Тошкент шаҳрида вафот этган. Пётр Каримов эса айни вақтда Россиянинг Москва вилоятида доимий истиқомат қилади.
Ислом Каримов кейинчалик Татьяна Акбаровнага уйланган. Бу никоҳдан 1972 йили тўнғич қизи Гулнора Каримова ва 1978 йили кенжа қизи Лола Каримова дунёга келган. Гулнора Каримованинг Ислом исмли ўғли ва Имон исмли қизи, Лола Каримова-Тиллаеванинг эса Марям ва Сафия исмли қизлари ва Умар исмли ўғли бор.
Ўзбекистон Биринчи Президенти Ислом Каримовнинг учинчи фарзанди ҳақида шу вақтгача расмий манбаларда маълумот берилмаган эди. Бироқ куни кеча ишга тушган Ислом Каримов илмий-маърифий мажмуаси сайтидаги расмий таржимаи ҳолда Биринчи Президентнинг «уч нафар фарзанд, олти нафар набираси» бўлгани таъкидланган.
Айни вақтда, илмий-маърифий мажмуа сайтида Ислом Каримовнинг фарзандлари ва набиралари ҳақида батафсил ахборот берилмаган.
Изоҳ (0)