30 октябрь куни Тошкент вилояти ҳокими Шукрулло Бобоев ўз лавозимидан озод этилгани маълум бўлди. Бунга унинг пахта ҳосилига қўшиб ёзишга йўл қўйгани сабаб қилиб кўрсатилган.
Ўзбекистон Президенти 18 август куни Тошкент вилоятининг Бекобод шаҳрида бўлиб, мустақиллик йилларида Тошкент вилоятига баракали ҳоким насиб этмагани ҳақида фикр билдирган эди.
Мавзуга доир:Тошкент вилоятининг барча ҳокимлари — битта суратда
Одамларнинг дарди билан яшаш энг катта, якка-ю ягона мақсадимиз. Ўзингиз гувоҳ бўлиб турибсиз, Тошкент вилоятига учинчи марта келяпман. Нима учун? Тошкент вилояти мустақиллик йилларида ҳамма соҳалар бўйича ривожланишда орқада қолгани адолатли ҳақиқат.Ер ости, ер усти бойликларига эга бўлган, қудратли, меҳнаткаш халқи бор бу вилоятдаги яшаш даражаси ҳозирги талабга жавоб бермайди десак, бу ҳам адолатдан бўлади. Умуман, мустақиллик йилларида Тошкент вилоятига эга топилмади, бирорта баракали ҳоким келмади десак, бу ҳам ҳақиқат.
Биласизми, мен ҳам иккита вилоятга ҳоким бўлганман. Оғир-оғир вилоятларда ишлаганман. Тошкент вилоятидаги каби имкониятларга, халққа, қудратга эга бошқа вилоят йўқ десам, менга ишонинглар. Суви, айниқса, ерини айтмасизларми! Жиззах вилоятида 74 фоиз ерлар шўрланган, Тошкент вилоятида эса 14 фоиз.
Иккинчидан, Самарқанд вилоятида Олмалиқ каби Худо берган кони йўқ. «Эй, мусулмон, мани ол, халқингга хизмат қил, ишлат», деган бундай замин йўқ, десак бу ҳам тўғри бўлади. Шу нуқтаи назардан, Бекободдаги «Ўзбекистон металлургия комбинати»нинг ҳозирги аҳволи иқтисодиётни ҳам, Бекободни ҳам, мени ҳам қониқтирмайди.
Шавкат Мирзиёев, Ўзбекистон Президенти
Изоҳ (0)