Кинорежиссёр Ҳилол Насимовнинг «Ўзбекфильм»дан кетиш сабаби маълум қилинди, деб хабар беради Uz24.
Аввал хабар берилганидек, Ҳилол Насимов «Ўзбекфильм» раҳбарлигидан озод этилди. «Ўзбеккино» ахборот хизмати қайд этишича, ушбу хабар ОАВ томонидан бошқача талқин қилинган, ижтимоий тармоқлар фойдаланувчиларида нотўғри фикр шаклланишига сабабчи бўлган. Шу сабабли агентлик бош директорининг биринчи ўринбосари Шуҳрат Ризаев юзага келган вазият юзасидан изоҳ берди.
«Таниқли кинорежиссёр Ҳилол Насимовнинг ‘Ўзбекфильм’ киностудияси директорлигидан озод этилди дегани унинг ижоддан бутунлай узоқлашди деган маънони англатмайди. Зеро, агентлик ахборот хизмати томонидан берилган хабарда ҳам ‘Насимовнинг бошқа ишга ўтганлиги сабабли’ деб изоҳ берилган. Гап шундаки, Ҳилол Насимовнинг кинорежиссурадаги тажрибаси инобатга олиниб, уни давлат буюртмаси асосида суратга олиниши режалаштирилаётган фильмларга жалб қилиш ва салоҳиятидан самарали фойдаланиш мақсад қилинган. Жумладан, ‘Ўзбеккино’ миллий агентлиги жорий йилнинг апрель–июнь ойлари давомида Ўзбекистон ёзувчилар уюшмаси билан ҳамкорликда ҳарбий-ватанпарварлик мавзуидаги сценарийлар учун танлов эълон қилган эди. Режиссёр Ҳилол Насимов ушбу танловда ғолиб бўлган сценарийлар асосида суратга олиниши режалаштирилаётган бадиий фильмларга жалб қилинганлигини маълум қиламиз», — деди Шуҳрат Ризаев.
Изоҳ (0)