IBM компанияси мутахассислари деҳлилик олимлар билан бирга Болливуддаги гендер тенгсизлигини аниқлаш мақсадида тадқиқот ўтказди. Тадқиқотчилар ҳинд фильмларида аёллар эркакларга қараганда икки марта камроқ эсланишини ва улар стереотип тушунчалар билан тасвирланишини аниқлади. Бу ҳақда TJournal хабар бермоқда.
Мутахассислар 1970—2017 йилларда тасвирга олинган ҳинд фильмларига бағишланган Wikipedia’даги 4000 мингта саҳифани ўрганиб чиққан. Улар фильмларнинг номларини, тасвирга олиш гуруҳини, сюжетларни, саундтреклар ва постерларни, шунингдек, 2008—2017 йилларда суратга олинган 880 та расмий трейлерни таҳлил қилган.
Сўнгги 50 йил ичида эркак қаҳрамонлар битта фильмда ўртача 30 марта эсланган, аёл қаҳрамонлар учун бу кўрсаткич 15 мартани ташкил қилган. Олимлар аёлларнинг ролларига камроқ аҳамият берилади, деган хулосага келди.
Аёллар ташқи сифатлар — «жозибадорлик», «гўзаллик» билан тасвирланади. Аёлларга нисбатан «турмушга чиқади», «севади» тез-тез феъллари ишлатилади. Эркаклар эса «ўлдиради», «отиб ташлайди» феълларини билан «кучли», «омадли» сифатида тасвирланади. Бундан ташқари, таништириш вақтида экаклар касбий сифатлари билан тасвирланса, аёллар ташқи кўриниши ва эркакларга бўглиқлиги (кимнингдир қизи ёки хотини) билан тавсифланади.
Тадқиқотчилар қаҳрамонларнинг касбидаги фарқларни ҳам қайд этиб ўтган. Эркакларнинг 32 фоиздан кўпроғи шифокорлар, адвокатлар ва полициячилар бўлса, аёл қаҳрамонларнинг аксарияти ўқитувчи ёки котиба бўлиб ишлаган.
Саундтрекларнинг таҳлилига кўра, аёллар эркакларга нисбатан камроқ қўшиқ куйлайди. Тадқиқотчиларнинг таъкидлашича, ҳинд киноматографиясида умуман олганда экаклар аёллардан кўра кўпроқ.
Бироқ сўнгги йилларда асосий ролни аёллар ўйнаётган фильмлар доимий ўсиб бормоқда. 2015—2017 йилларда аёллар фильмларнинг 11,9 фоизида марказий қаҳрамон бўлган. 1970 йилларда бу кўрсаткич тахминан етти фоизни ташкил қилган.
Изоҳ (0)