«Ўзбеккино» миллий агентлигида Тошкентдаги Гёте институти раҳбари Габриэль Беккер билан учрашув бўлиб ўтди, деб хабар беради агентлик матбуот хизмати.
Учрашувда Ўзбекистон-Германия ўртасидаги турли соҳаларда, жумладан санъат ва маданиятда ривожланиб бораётган икки томонлама алоқалар алоҳида таъкидлаб ўтилди.
Айниқса, кинематография соҳасида олиб борилаётган ўзаро ҳамкорлик алоқалари туфайли бугун Ўзбекистонда мунтазам равишда немис фильмлари фестиваллари ўтказиб келинмоқда.
«Ўзбеккино» миллий агентлиги бош директори Фурқат Зокиров Гёте институти ва Германиянинг Хемниц шаҳрида ўтказиладиган халқаро кинофестиваль ҳамкорлигида Ўзбекистонда ташкил этиб келинаётган «Шум бола» болалар ва ўсмирлар фильмлари кинофестивали ҳақида фикр билдириб, ушбу маданий тадбирга бўлган қизиқиш тобора ортиб бораётганини эътироф этди.
Томонлар кинофестивални вилоятлар марказларида ҳам ўтказиш ва Германияда ўтадиган Хемниц кинофестивалига эса ўзбек фильмларини ҳам жалб қилиш юзасидан фикр алмашди.
Шунингдек, учрашувда пойтахт кинотеатрларидан бирида мунтазам равишда немис фильмларини намойиш этиб бориш масаласи ҳам муҳокама қилинди.
Изоҳ (0)