Amazon Key маҳсулотларни уйга етказиб берувчи янги хизмат бўлиб, курьерни масофадан туриб уйга киритишга имкон беради. Мижоз махсус мобил дастурни смартфонга юклаб олиши, «ақлли» қулф ва Cloud Cam камерасини сотиб олиши керак, деб ёзмоқда TJournal.
Смартфонга ўрнатиладиган дастур Amazon Home Serviceс хизматига уланган бўлиб, у орқали овқат ёки уйни тозалашни буюртма қилиш мумкин. Мижоз эшикни очиш паролини кўрсатади ва уйда бўлмаган вақтда жараённи смартфон орқали кузатиб туради. Курьер ёки уйни тозаловчи паролни киритиб, мижоздан тасдиқ олгач, уйга киради.
Amazon томонидан таъкидланишича, Key жўнатмаларни остонада ёки почта қутисида қолдирилишини хоҳламайдиган мижозларга асқотади. Shorr Packaging компаниясининг сўрови натижаларига кўра, ҳолатларнинг 31 фоизида мижозлар етказилган маҳсулотларнинг ўғирлаб кетилганига дуч келади.
Amazon Key 8 ноябрда АҚШнинг 37 та шаҳрида ишлай бошлайди. Қурилманинг тўлиқ жамланмаси 320 доллар, уйни кузатишга имкон берувчи Cloud Cam камераси эса 120 доллар туради.
Изоҳ (0)