Facebook «Хайрли тонг» иборасининг «Уларга ҳужум қилинг» каби таржима қилингани учун фаластинлик фойдаланувчидан кечирим сўради. Фойдаланувчи мазкур таржима сабабли бир неча соат давомида полиция бўлинмасида ушлаб турилган. Ижтимоий тармоққа Microsoft Бинг таржимони ўрнатилган бўлиб, у ёзувларни автоматик равишда таржима қилади. Фаластинлик «Хайрли тонг» иборасини ёзганида автоматик таржимон уни «Уларга ҳужум қилинг» каби таржима қилган, деб хабар бермоқда TJournal.
Исроил полицияси 22 октябрь куни Facebook’да ўз сурати ва унинг остида араб тилида «Хайрли тонг» деган ёзувни эълон қилган фаластинликни қўлга олган. Полиция ходимлари Facebook’нинг иврит тилига қилган «Уларга ҳужум қилинг» таржимасига асосланиб фаластинлик фойдаланувчини ҳибсга олган.
Ҳодисадан сўнг Facebook ҳеч қандай изоҳ бермаган, бироқ 25 октябрда таржимада хатолик юз берганини тан олган ва фаластинликдан кечирим сўраган.
«Бизнинг таржималаримиз кун сайин яхшиланиб бораётганига қарамасдан, вақти-вақти билан бунга ўхшаш хатолар юз бермоқда. Биз бу мауммони ҳал қилиш учун чоралар кўрдик», — дейилади Facebook баёнотида.
Фаластинлик полиция бўлинмасида бир неча соат сўроқ қилинган ва шундан сўнг ёзувни ўчириб ташлаган. Исроил полициясининг маълум қилишича, уларни фойдаланувчининг ёнидаги булдозер хавотирга солган, чунки бундай булдозерларда терактлар амалга оширилган. Полиция ходимларининг қўшимча қилишича, улар ҳам фаластинликдан узр сўраган.
Изоҳ (0)