Илон Маскнинг Tesla компанияси ўз ҳисобидан Пуэрто-Рикодаги Hospital del Nino болалар шифохонасини қуёш батареялари ва Powerwall аккумуляторларидан иборат тизим билан жиҳозлади. Tesla бу тизимни биринчи марта етти иш кунида ўрнатишга муваффақ бўлди, деб ёзмоқда TJournal.
Hospital del Nino шифохонасининг биноси бундан кейин дизель генераторлари ҳисобига ишламайди: Tesla’нинг қуёш батареялари ва аккумуляторлари 500 киловатт электр энергияси ишлаб чиқаради.
Сентябрь ойининг охирида Пуэрто-Рико оролига ёпирилган «Мария» тўфони оролдаги кўплаб электр узатиш тармоқларини вайрон қилган. Қарийб уч миллион киши электр энергиясисиз қолди. Уларни тиклаш учун эса кўплаб ойлар талаб қилинади. Шу вақт ичида орол аҳолиси дизель генераторларига ўтди, бироқ улар барқарор эмас ва тез-тез ўчиб қолади. Бундан ташқари, шу пайтгача 2,5 миллион киши электр токисиз яшамоқда.
5 октябрда Илон Маскнинг Twitter’даги обуначиларидан бири ундан Tesla Пуэрто-Рикодаги бузилган энерготизимни мустақил қуёш батареялари ва аккумуляторлар билан қайта қура оладими, деб сўраган. Тадбиркор бундай лойиҳалар кичик ороллар учун аллақачон амалга оширилганини айтган ва қамровлиликда чегара йўқлигини таъкидлаб, компания Пуэрто-Рико учун ҳам бу ишни қилишга тайёрлигини билдирган.
Кейинги куни эса ҳудуд губернатори Рикардо Росселло Маскка мурожаат қилган. У мазкур имкониятни муҳокама қилишни таклиф қилган ва Tesla бутун дунёга ўзининг қамрови ва қудратини кўрсатишни хоҳлайдими ёки йўқлигини сўраган.
Изоҳ (0)